COB, a terceira consecutiva

Ficha técnica
Ourense Provincia Termal 77: Christian Díaz (6), Mitrovic (7), Jukic (4), Dmitry Flis (12), Fran Guerra (8) –cinco inicial- Devin Wright (9), Kapelan (21), Martín Rodríguez (7), Tomás Fernández (0) e Kyle Hittle (3).  
Melilla 72: Jorge Sanz (3), Alfredo Ott (6), Suka-Umu (5), Pablo Almazán (6), Arteaga (15) –cinco inicial- Edu Gatell (2), Pedro Rivero (16), Héctor Manzano (9) e Van Wijk (10).
Parciais: 22-18, 23-18 (45-36), 21-17, 11-19 (77-72).
Árbitros: Sánchez Ardid e Domingo Vilalta. Eliminaron por cinco faltas persoais a Cristian Díaz nos locais e Suka-Umu nos visitantes.
Incidencias: partido da 5ª xornada da LEB Ouro no pazo Paco Paz ante 2.200 espectadores.

Só 11 puntos, dúas triplas de Kapelan e cinco tiros libres de Mitrovic, nos últimos dez minutos. Estivo todo o partido arriba o COB (agás un 11-13), pero sufriu no último cuarto por mor dos árbitros e dun parcial de 3-14 de Melilla que apertou o marcador (69-67). Pero Diego Kapelan anotou dúas triplas consecutivas (75-68), Mitrovic dous tiros libres e Ourense sumou un máis que merecido triunfo (77-72) ante un dos mellores planteis da LEB Oro. Tralas dúas derrotas iniciais, terceira vitoria consecutiva dun COB que medra xornada a xornada. O vindeiro sábado (pola TVG2), derbi en Riazor contra Básquet Coruña.

COB arrincou cun 7-0 e Dmitry Flis sumou os nove primeiros puntos dos ourensáns. O ex-cobista Suka-Umu tirou dos seus e Melilla respostou cun parcial de 0-9 para acadar a sús única vantaxe no partido (11-13). Pero un parcial local de 6-0 devolveu as cousas a onde estaban, e un 2+1 de Devin Wrigt pechou o primeiro cuarto: 22-18. Coas triplas de Kapelan, Hittle e Martín Rodríguez e catro puntos de Wright, o COB abriu unha primeira fenda importante: 35-25. Melilla parou o partido, 5 puntos de Van Wijk e foi COB quen pediu tempo con 35-30. Kapelan anotou dúas triplas e os ourensáns mandaban 45-36 no descanso.

Christian Díaz puxo o 48-36 dende 6,75, pero Melilla acadou un parcial de 0-9 e obrigou a Gonzalo García a parar o partido (48-45). De novo cinco puntos de Kapelan e tempo de Melilla con 55-45. A segunda tripla de Christian Díaz puxo a máxima diferenza local: 60-47. Rivero sumou catro puntos pero recibiu unha técnica, e Ourense mantivo a vantaxe para o último cuarto: 66-53.
Cinco puntos de Melilla en dous minutos e tempo do COB con 66-58. O parcial medrou ata un 0-9 e Melilla, coa permisividade arbitral, asustaba (66-62). A quinta de Suka-Umu foron tres puntos dende o tiro libre para Mitrovic (69-62). Pero unha técnica por protestar a Christian Díaz (eliminado) e unha falta en ataque a Mitrovic, e Melilla estaba na pelexa (68-67). Kapelan deu aire ao COB cunha tripla (72-67) e sentenciou con súa sexta bomba do partido (75-68). Mitrovic pechou a vitoria con dous tiros libres: 77-72.

Ficha técnica
Araberri 82: Óscar Alvarado (9), Papantoniou (13), Hearst (16), Cvetinovic (20), Kyle Rowley (10) –cinco inicial- Berhanemeskel (12), Iván García (2), Martín Buesa (0) e Dani Lorenzo (0).
Marín Peixegalego 71: José Simeón (0), Manu Ferreiro (7), Andrés Miso (4), Tim Derksen (24), Javi Múgica (4) –cinco inicial- Jason Cain (22), Oubiña (3), Goyo Adón (4), Marc Bauzá (2), Mario Cabanas (0) e Albert Homs (0).
Parciais: 21-17, 22-17 (43-34), 15-20, 24-17 (82-71).
Árbitros: Carpallo Miguélez e González Cuervo. Eliminaron por cinco faltas a Kyle Rowley.

Chegou a estar 14 puntos abaixo o Peixegalego (49-35), pero reaccionou cos puntos de Tim Derksen e Jason Cain para chegar a empatar o choque (64-64) a seis minutos do final. Foi a aparición do grego Papantoniou (11 puntos e tres triplas no último cuarto) quen decidiu a contenda para Araberri no último cuarto. Ao final, 82-71, terceira derrota de Marín en 5 xornadas.

Os locais comezaron gañando (12-5), pero os puntos de Javi Múgica igualaron o partido (14-14). O eritreo Berhanemeskel deu vantaxe a Araberri no final do primeiro cuarto (21-17). Marín púxose por diante con dúas triplas (21-23), pero Cvetinovic e Hearst abriron oco para os vitorianos (39-29). Jason Cain termaba do Marín, que chegou nove abaixo ao descanso: 43-34.

Araberri acadou a máxima diferenza (49-35) no terceiro cuarto, pero reaccionou o Marín cun parcial de 3-12 para achegarse no marcador. Ao final do terceiro cuarto, 58-54 e todo por decidir. Cain e Derksen empataron o partido (64-64), pero apareceu Papantoniou e con dúas triplas e 8 puntos consecutivos abriu un oco definitivo (76-67). Ao final do partido, derrota por 82-71, con 24 puntos de Tim Derksen e 22 de Jason Cain.