O festival Amal proxecta este martes a primeira película rodada en Iemen por unha muller

A segunda sesión do festival 'Amal' deste martes, ás 22,00 horas, será para a longametraxe de ficción 'Dez anos e divorciada', dirixido por Khadija Al-Salami en 2014.

A coprodución de Francia, Iemen e EAU narra como unha nena entra nunha sala de xustiza, mira o xuíz aos ollos e dille: "Quero divorciarme".

En Iemen, onde non hai ningún requisito de idade para o matrimonio, Nojoom é obrigada aos dez anos a casar cun home vinte anos maior ca ela.

A película abandeira o feminismo e brinda visibilidade a todas as rapazas forzadas a ser mulleres demasiado pronto, poñendo de relevo o seu dereito a unha vida digna. Baseada no 'best seller' que narra a vida real de Nojood Ali, '10 anos e divorciada' é a primeira película rodada en Iemen por unha muller.

Khadija Al-Salame naceu en Saná (Iemen). Foi obrigada a un matrimonio infantil aos once anos, cun home vinte anos maior, revelouse contra os valores tribais e familiares e deixou ao seu marido e pediu o divorcio. Aos dezaseis anos recibiu unha bolsa que lle permitiu perseguir o seu sono de estudar cinema en Estados Unidos.

O festival presenta un cartel con once películas centradas no papel da muller. Ao longo de toda a semana, do 24 ao 29 de outubro, as proxeccións poderanse ver nun primeiro pase ás 20,00 horas (por 2 euros) e outro ás 22,00 horas (por 3), agás a primeira proxección de xornada inaugural deste luns e a última do sábado, ás 12,00 horas, que serán gratuítas.