SANTIAGO DE COMPOSTELA | 25/10/2016 | Actualizada ás 12:32 por EUROPA PRESS
O consello de administración de Abanca aprobou o nomeamento de Eduardo Eraña -ata fai uns meses presidente de Visa Internacional, Rexión América Latina e o Caribe- como novo conselleiro independente da entidade.
Tras esta incorporación, o máximo órgano de goberno do banco está composto por nove membros, cinco deles independentes. Eraña foi designado polo consello presidente da comisión de nomeamentos.
Con máis de 40 anos de experiencia no sector financeiro como experto en medios de pagamento, Eduardo Eraña foi ata fai uns meses presidente de Visa Internacional, Rexión América Latina e o Caribe, e asumiu a estratexia e proxectos do negocio da compañía en 44 países.
Pola súa banda, Abanca destaca que nos últimos anos se mostra "especialmente activa" no lanzamento de produtos innovadores no segmento de medios de pagamento, ben con novas tarxetas, ben con novos servizos de pagamento a través da banca móbil (Abanca Pay, Abanca Cash, servizo Samsung Pay).
Anteriormente, Eraña, contador público pola Universidade Nacional Autónoma de México, desempeñou os cargos de vicepresidente executivo en Visa ALC e presidente de Visa México. Durante a súa xestión consolidou a Visa como líder nos sistemas de pagamento electrónicos en América Latina e o Caribe.
O consello de Abanca está formado por Javier Etcheverría de la Muela, presidente; Juan Carlos Escotet Rodríguez, vicepresidente; Francisco Botas Ratera, conselleiro delegado e os vogais Eduardo Eraña Guerra, José García Montalvo, Pedro Raúl López Jácome, José Ramón Rodrigo Zarza, Ignacio Sánchez-Asiaín Sanz e Carina Szpilka Lázaro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.