Facenda só fala en castelán

“A lingua dos procedementos tramitados pola Administración Xeral do Estado será o castellano. Porén o anterior, os interesados que se dirixan aos órganos da Administración Xeral do Estado con sede no territorio dunha Comunidade Autónoma poderán tamén empregar a lingua que sexa cooficial nela. Neste caso, o procedemento tramitarase na lingua elixida polo interesado. (…)”. É o que recolle o  artigo 36.1 da Lei 30/1992. E, a pesar diso, a Axencia Tributaria, segue sen dar a posibilidade aos galegofalantes de utilizar o seu idioma.

Unha oficina da Axencia Tributaria | Fonte: Ministerio de Hacienda

Unha nova denuncia da Mesa volve a incidir nun feito que xa se repite que é a imposibiidade de que as persoas que acoden ás delegacións de Facenda a realizar certos trámites poidan utilizar libremente o galego.

O último caso coñecido a través do servizo A Liña do Galego, foi o dunha persoa que se dirixiu en reiteradas ocasión a Facenda, nun trámite de devolución, para reclamar o seu dereito a que os procedementos dun expediente se realizasen, tamén por parte da AEAT, en galego. Ante a falta de resposta, este cidadán viuse na obriga de devolver o ingreso realizado pola administración tributaria como mostra de protesta “coa maneira en que a AEAT trata aos usuarios da lingua galega”.

Finalmente, e segundo apunta A Mesa, Facenda dignouse a utilizar o galego matizando nun escrito oficial que “nas aplicacións corporativas de Recadación non hai posibilidade de que as comunicacións se realicen en galego”.

Non é a primeira vez que isto acontece. De feito, Facenda chegou a multar á Mesa pola Normalización lingüística por entender que reclamar as notificación en galego era “obstruír” un procedemento. A sanción foi recorrida pola Mesa no tribunal económico- administrativo que lle deu a razón á entidade en defensa da lingua.