Aberta a XIV edición dos Premios Buero de Teatro Joven de Fundación Coca-Cola

Fundación Coca-Cola, xunto co Instituto Nacional das Artes Escénicas e da Música (INAEM), dependente do Ministerio de Educación, Cultura e Deporte, lanzaron a convocatoria da XIV edición dos Premios Buero de Teatro Joven, que estará aberta ata o 20 de abril de 2017, segundo informa a entidade organizadora.

Con estes premios, Fundación Coca-Cola promove que os mozos poidan desenvolver a súa faceta máis artística e creativa a través das artes escénicas. Os premios están dirixidos a novos de entre 14 e 21 anos, que poderán inscribirse a través de www.fundacioncocacola.com.

O concurso consta de dúas fases, unha autonómica e outra nacional, ao longo das cales os participantes aprenden a traballar en equipo e teñen a oportunidade de coñecer as diferentes ferramentas para levar a cabo unha obra teatral, tanto de escenografía coma de aprendizaxe e personaxes. Ademais, os finalistas, que poderán asistir a un campus especializado en teatro en Madrid, poderán compartir con outros mozos a súa paixón polo teatro e aprender de profesionais do mundo do teatro do ámbito nacional.

Na fase autonómica, o Xurado elixirá aos mellores grupos de cada comunidade. Ademais, seguirase apostando por ofrecer formación teatral a través dos MiniCampus de Inverno, que se celebrarán en diferentes comunidades autónomas durante os meses de febreiro e marzo. Poderán asistir tanto profesores como novos participantes na edición actual e os seus contidos estarán orientados a ofrecer mellores ferramentas teatrais que lles poidan axudar no proceso de creación das montaxes e os personaxes.

Na fase final, o Xurado Nacional, composto por personalidades do mundo do teatro, elixirá a catro grupos, tres deles na categoría escolar e un cuarto na categoría non escolar. Estes catro grupos terán a oportunidade de representar a súa obra nun dos Teatros do Centro Dramático Nacional de Madrid.

Ademais, unha vez rematado o concurso, os grupos finalistas dos Premios Buero de Teatro Joven poderán gozar en xullo en Madrid do X Campus Coca-Cola de Teatro Novo, onde os mozos asistirán de forma gratuíta a talleres, masterclasses, actividades e actuacións teatrais.

Ao longo de todas as súas edicións, participaron preto de 60.000 mozos, máis de 3.000 grupos teatrais e máis dun millón de espectadores de toda España. Na XIII edición participaron máis de 7.000 mozos de toda España, dos que 520 eran galegos, e os gañadores foron o grupo Clásicos Lúa de Zaragoza, na categoría escolar, e a compañía OtroMundo, de Navarra, na categoría non escolar.