PONTEVEDRA | 28/10/2016 | Actualizada ás 17:41 por EUROPA PRESS
O Instituto Valle-Inclán de Pontevedra celebrou este venres o seu medio século de historia nun acto no que tamén se conmemorou o 150 aniversario do nacemento en Vilanova de Arousa do dramaturgo Ramón María del Valle-Inclán, que deu nome a este centro por proposta de Gonzalo Torrente Ballester.
O director da Real Academia da Lingua Española (RAE), Darío Villanueva, e do secretario xeral de Cultura, Anxo Lorenzo, participaron neste acto, no que estiveron presentes un bo número de profesores do centro durante as últimas décadas.
A actual directora do instituto, Pilar Freitas, dirixiuse aos asistentes relatando a traxectoria do centro, polo que pasaron ilustres personaxes como Losada Diéguez, Castelao, Bibiano Fernández Osorio-Tafall, o propio Torrente Ballester e Filgueira Valverde, director durante 25 anos deste centro situado na avenida Montero Ríos.
O tenente de alcalde, Carme da Silva, que tamén foi alumna do centro, quixo durante o acto sinalar que o instituto forma parte inseparable da historia de Pontevedra e que foi o lugar onde xurdiu a Aula de Filosofía Castelao e, ao mesmo tempo, a Semana Galega de Filosofía. Ademais, a representante do goberno local quixo facer unha especial referencia á profesora de lingua galega Vitoria Ogando, que se atopaba no paraninfo, porque foi fundamental para que dende o centro público moitos estudantes entrasen en contacto co galego.
Ao acto tamén asistiron outros integrantes da corporación pontevedresa, como Jacobo Moreira, voceiro do grupo municipal do PP, e a voceiro de Ciudadanos, María Rey.
VINCULACIÓN CON PONTEVEDRA
Pola súa banda, Anxo Lorenzo felicitou a comunidade educativa e recordou que Pontevedra foi unha vila moi importante para a formación do dramaturgo Valle Inclán, que "creceu intelectual e literariamente nesa Pontevedra decimonónica".
Varios estudantes do centro realizaron neste aniversario a lectura de fragmentos de textos do dramaturgo e tamén unha moza interpretou unha peza ao violín de Manuel Quiroga.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.