Por Galicia Confidencial | Compostela | 30/10/2016 | Actualizada ás 15:08
O presidente do Parlamento galego, Miguel Santalices, defendeu o salario "digno" que perciben os deputados da Cámara autonómica por realizar un traballo "digno". "Non é só o que se fai no Parlamento", defendeu, para logo engadir que os parlamentarios teñen que estar na sociedade e iso implica, ao seu xuízo, "unha serie de desprazamentos e custos" para facer, precisamente, unha "representación digna".
Esta afirmación de Santalices chega xusto despois de que se abrira un debate público sobre a utilización, por parte dos portavoces e líderes das formacións políticas, de chóferes para poder desprazarse. Un debate que iniciou o novo líder de En Marea, Luís Villares, que lle reclama a súa formación un chófer para poder desprazarse a actos políticos. Nin Feijóo, nin o propio Santalices quixeron pronunciarse sobre esta cuestión. Precisamente, o presidente da Cámara sinalou que espera que o respecto institucional "predomine" na actividade parlamentaria da Cámara galega.
Nunha entrevista en RNE recollida por Europa Press, Santalices tamén asegurou que o feito de que o PP ostente a maioría absoluta no Parlamento galego "non impide que haxa debates produtivos" ou que se chegue a "consensos".
Logo da súa reunión co presidente da Xunta en funcións, Alberto Núñez Feijóo, Santalices sinalou que este mostroulle as súas "ganas de traballar" como "se fose a súa primeira lexislatura", ademais de transmitirlle aspectos que lle preocupan: desemprego, sector primario e políticas sociais.
Así mesmo, indicou que, para el, esta nova lexislatura trátase dunha etapa "ilusionante" na que, "por encima de todo", "vai estar sempre Galicia". Trátase dunha nova etapa na que, segundo transmitiu Santalices, terá "a man tendida".
Sobre os orzamentos e o teito de gasto, relatou que hai que "estudar ben" o calendario de plenos, xa que o pleno do teito de gasto será un pleno extraordinario. Así mesmo, sinalou que será necesario habilitar "con toda seguridade" o mes de xaneiro para os orzamentos.
Por último, mostrouse a favor da "transparencia" no Parlamento, que debe ser coñecido por "toda a sociedade". Por iso, aposta por "camiñar na senda da participación cidadá".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.