Por Aixa | Ourense | 17/11/2016
Os Obxectivos de Desenvolvemento Sostible aprobados polas Asemblea das Nacións Unidas en 2015 danlle á auga a importancia que merece como elemento imprescindible para a vida e benestar dos seres humanos. Deste xeito a obxectivo 6 fixouse como “Garantir a dispoñibilidade de auga e a súa xestión sostible e o saneamento para todos e todas”.
Hoxe en día a escaseza de auga afecta a mais do 40% da poboación mundial, 2.400 millóns de persoas carecen a acceso a servizos básicos de saneamento e mais do 80% das augas residuais resultantes das actividades humanas vértense aos ríos ou ao mar sen que se eliminen previamente os contaminantes que portan. Case 1.000 nenos e nenas morren cada día por enfermidades relacionadas co consumo de augas en mal estado.
A universidade, como institución dedicada á investigación e ao desenvolvemento ten un papel importante que xogar, aportando, tanto á nosa sociedade como as sociedades menos desenvoltas, solucións aos problemas, locais e globais aos que nos enfrontamos. Non é unha obriga legal, é unha obriga ética e social que forma parte do propio ser universitario.
O Campus da Auga nace coa vocación de ser motor de investigación multidisciplinar e transferencia de coñecemento no ámbito da auga. O Campus da Auga nace tamén cunha vocación de internacionalización e de solidariedade a través da investigación aplicada aos problemas do desenvolvemento.
A xornada que presentamos quere ser un primeiro paso para dar a coñecer entre a comunidade universitaria (profesorado, investigadores, alumnado e persoal de administración e servizos), e tamén á sociedade en xeral, o papel que o Campus da Auga pode e quere xogar neste ámbito. Nesta xornada escoitaremos as experiencias que se teñen desenvolto noutros lugares, cales son as liñas de investigación mais importantes e necesarias e coñeceremos experiencias que xa se teñen desenvolto no noso campus.
Programa
10:00.- Presentación da xornada a cargo do Vicerreitor do Campus de Ourense, Dr. Virxilio Rodríguez Vázquez
10:15.- Universidade e cooperación ao desenvolvemento, a investigación ao servizo dos pobos. A cargo de Emilio M. Martínez, coordinador na Universidade de Vigo da Rede Galega de Cooperación Universitaria para o Desenvolvemento.
10:45.- A auga como eixe do desenvolvemento. Liñas básicas de actuación. A cargo de Francisco González, xeólogo, asesor estratéxico do Fondo de Cooperación para a Auga e Saneamento, Agencia Española de Cooperación Internacional para el Desarrollo, AECID.
12:00.- Descanso
12:30.- Investigación e formación para a cooperación ao desenvolvemento no ámbito da auga e saneamento. A experiencia da Universidad de Alcalá. A cargo de Luis F. Rebollo Ferreiro, profesor emérito da Universidad de Alcalá, membro do grupo de investigación COOPUAH (centrado na investigación multidisciplinar para o desenvolvemento humano nos países menos avanzados).
13:15.- Campus da Auga: liñas de investigación no ámbito da cooperación ao desenvolvemento: aportacións dende o Dereito Internacional Público. A cargo de Laura Movilla Pateiro, Profesora Axudante Doutora da área de Dereito Internacional Público da Universidade de Vigo, Campus da Auga e grupo de investigación MEDEA Iuris do Campus de Ourense.
14:00.- Peche da xornada.
A inscrición na xornada é gratuíta.
Para inscribirse é preciso enviar un correo electrónico a vicou@uvigo.es indicando:
Nome e apelidos e DNI:
Teléfono:
Ocupación (PAS, PDI, estudantes, outros):
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.