“O Islam é a única relixión” na web do Bispado de Lugo
Anosavoz.com , a web oficial do Bispado de Lugo, está caída. Tirárona os propios administradores, despois de sufrir un ataque informático este domingo.
Por Galicia Confidencial | Lugo | 22/11/2016 | Actualizada ás 14:53
A páxina eclesiástica apareceu con imaxes de musulmáns de Birmania vítimas do conflito nese país coa maioría de relixión Budista. O ataque era reivindicado na mesma web por un gruop denominado Tunisian Cyber Resistance Al Fallaga Team (Cíber Resistencia Tunecina Equipo Al Fallaga).
O voceiro do Bispado, José Manuel Castro, prometeu en Radio Lugo que a web quedará restablecida hoxe. A Igrexa asegura que os informáticos están traballando para solventar o ataque do que non deron máis detalles sobre o seu alcance. Aseguran, iso si, que non se produciron prexuízos económicos para o Bispado.
“Deste grupo non sei máis do que parece nesta pantalla de ‘hackeo’; sei que teñen páxina en Facebook e canle de vídeo en Youtube e nelas se presentan como un grupo non islamista, pero que tenta responder contra ataques contra musulmáns no mundo”, explicou Castro.
Os hackers afirmana no seu ataque que o “Islam é a única relixión” e pedían a fin da violencia contra os musulmáns en Birmania.
