Joselu, a única boa nova

Ficha técnica
Real Betis 1: Dani Giménez; Piccini, Mandi, Donk, José Carlos, Durmisi; Darko Brasanac (Fabián, 86’), Jonas Martin (Bruno, 64’), Felipe Gutiérrez; Sanabria (Joaquín, 64’) e Álex Alegría.
RC Deportivo 0: Rubén Martínez; Juanfran, Raúl Albentosa, Sidnei, Fernando Navarro, Luisinho; Álex Bergantiños (Celso Borges, 75’), Pedro Mosquera (Guilherme, 46’); Carles Gil, Marlos Moreno (Joselu, 67’) e Florin Andone.
Gol: 1-0: Sanabria (minuto 18).
Árbitro: De Burgos Bengoechea (vasco). Amarelas Jonas Martin (35’) e Darko Brasanac (86’) no Betis e a Álex Bergantiños (73’) e Luisinho (79’) no Dépor.
Incidencias: partido de ida dos 1/16 de final da Copa disputado no estadio Benito Villamarín ante 18.774 espectadores. Minuto de silencio polas víctimas do equipo brasileiro Chapeconense no accidente aéreo en Colombia.

A boa nova, o regreso do agardado Joselu, que xogou os últimos 25 minutos na estrea do Dépor na Copa tras dous meses e medio de ausencia e case marca. O partido, de pouca calidade, para esquecer axiña. O resultado, 1-0 para o Betis, que obriga aos deportivistas a remontar no partido de volta en Riazor, o vindeiro 21 de decembro ás 21.00 horas.

Dous equipos máis preocupados pola súa marcha na Liga (Dépor, 10 puntos; Betis, 14) e con trocos nos seus onces, máis no equipo de Víctor Sánchez del Amo. Gaizka Garitano xogou con moitos dos habituais titulares, aínda que deu os primeiros minutos do curso a dous galegos: o meta Rubén Martínez e o capitán Álex Bergantiños.

O Dépor tivo máis dominio pero non aproveitou as súas oportunidades, e o Betis marcou na primeira ocasión que tivo: incursión pola esquerda do dinamarqués Durmisi e centro para o remate coa testa de Sanabria. O 1-0 que sería definitivo no minuto 18. O Dépor reaccionou e tivo dúas boas chegadas: un disparo lonxano de Juanfran que Dani Giménez despexou a córner e un remate coa testa de Sidnei tras un córner lanzado por Carles Gil. Ningunha acción máis de perigo ata o descanso.

Trala reanudación, mesmo guión e mesma escasa calidade. Dominio do Dépor pero sen ideas para facer dano ao rival. Luisinho tentouno no 53’ dende o bordo da área pero sen éxito. O Betis apenas asomou pola portaría de Rubén. A boa nova do partido chegou no 67, co regreso de Joselu aos terreos de xogo substituíndo a Marlos Moreno. E a piques estivo de marcar o de Silleda no seu primeiro remate coa testa, a quince minutos do final, pero foiselle preto do pau da meta bética. O dominio deportivista non trouxo máis ocasións, agás un tiro de Navarro a sete do final. Partido de difícil dixestión para os afeccionados. O Dépor deberá remontar en Riazor.