Por gcdeportes | Vigo | 01/12/2016 | Actualizada ás 00:24
Ficha técnica
UCAM Murcia 0: Biel Ribas; Tekio, Tito, Hugo Álvarez, Góngora; Basha, Juande (Morillas, 61’), Isi Ros, Guichón (Juanma, 81’); Pere Milla (Pallarés, 67) e Natalio.
RC Celta 1: Sergio Álvarez; David Costas, Sergi Gómez, Cabral, Roncaglia (Jonny, 82’); Marcelo Díaz (Daniel Wass, 46’), Pape Cheikh, Tucu Hernández; Josep Señé, Naranjo e Guidetti (Giuseppe Rossi, 65’).
Gol: 0-1: Sergi Gómez (minuto 42).
Árbitro: Álvarez Izquierdo (catalán). Amarelas Guichón (29'), Góngora (37') e Hugo Álvarez (74') nos locais e a Tucu Hernández (31') e Naranjo (52') nos celestes.
Incidencias: partido de ida dos 1/16 de final da Copa disputado no estadio da Condomina ante 5.103 espectadores. Minuto de silencio en homenaxe ás vítimas do accidente aéreo de Colombia.
Trámite sen brillo. O mellor foi o marcador, 0-1 cun solitario gol de Sergi Gómez; mágoa dun chisco máis de ambición para deixar pechada a eliminatoria xa na ida. Pero agás sorpresa maiúscula (o xoves 22 en Balaídos), o Celta estará na vindeira eliminatoria da Copa tras vencer pola mínima o UCAM Murcia na Condomina. O equipo do Toto Berizzo dominou pero non xerou demasiado perigo ante un rival de categoría inferior (Segunda División).
Moitos trocos en ambos os dous equipos, con David Costas, Pape Cheikh, Josep Señé e Jose Naranjo no once celeste. Minutos iniciais de tanteo, con poucas chegadas á portaría e sen un dominador claro. A mellor ocasión local foi no minuto 26, cun disparo de Guichón que obrigou a Sergio Álvarez a lucirse. A resposta chegou por parte de Tucu Hernández, pero Biel Ribas evitou o 1-0. Pouco antes do lecer, o único gol do partido: falta sobre a área local, Roncaglia remata ao pau esquerdo da portaría murciana e Sergi Gómez aproveita o rexeite para marcar o 0-1.
Daniel Wass entrou por Marcelo Díaz no descanso, pero houbo poucas variacións trala reanudación: minutos sen un dominador claro ata que o Celta asumiu o mando, pero sen levar perigo á área rival. Entrou Rossi por Guidetti no 65, e o italiano marcou coa testa un gol que foi anulado por fóra de xogo. A mellor dos murciano foi un saque dende o curruncho no que Góngora buscou o gol olímpico e petou na madeira. O UCAM botoulle máis gañas nos minutos finais, pero o Celta non pasou apenas apuros e mantivo o 0-1, un bo resultado para a volta en Balaídos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.