Villanueva augura un ano “duro” que estará “marcado por discrepancias políticas”

O delegado do Goberno en Galicia, Santiago Villanueva, augurou que vai empezar un ano "que estará marcado polas discrepancias políticas" e advertiu de que "os precedentes levan a pensar que o camiño vai ser duro". "Pero estou seguro de que os valores que guiaron os pais da Constitución poden ser a referencia para traballar, todos xuntos, para o ben de España e de Galicia", remarcou.

Así, na celebración principal en Galicia do Día da Constitución española, que se adianta un día á data oficial, Villanueva pediu que a Carta Magna aprobada en 1978 "ten que seguir sendo referente do comportamento institucional". "Os principios de lealdade, de unidade e de solidariedade deben estar presentes nas nosas responsabilidades diarias, na nosa xestión política e pública", destacou.

"Ano a ano conmemoramos a Constitución, un texto co que iniciamos o camiño 38 anos dan para moitos discursos", remarcou no seu discurso, que comezou cun recordo ás palabras do primeiro delegado do Goberno en Galicia, Domingo García Sabell.

"Reafirmar o apoio á Constitución, expandir os seus valores e afondar no coñecemento da Carta Magna que garante a democracia en España e en Galicia foi e será tarefa prioritaria das institucións, das forzas políticas e sociais do pobo," rememorou.

Na súa intervención, o delegado do Goberno sinalou a importancia da Carta Magna e de todos os debates que rodearon a súa elaboración e redacción, un proceso que cualificou de "lección de historia política e social", que "non pertence ao pasado remoto, senón que son moito máis próximas no tempo". "O que a nós, acostumados ás presas e aos cambios fulgurantes, parécenos unha eternidade, en medida histórica, son soamente minutos", ilustrou.

CUESTIONA QUE SE MANTIVESE O SEGREDO

Non obstante, fronte aos traballos realizados a finais dos setenta, Villanueva cuestionou que fose posible agora levalo a cabo como entón. "Diriamos que o mundo é outro, que a sociedade está a evolucionar; agora ninguén podería garantir o segredo das deliberacións políticas", manifestou, antes de advertir de que iso é a "clave" do éxito nunhas conversacións.

A preguntas dos medios posteriores ao acto, e sobre a quen se refería con esas palabras, Santiago Villanueva precisou que "hoxe en día é difícil que se manteña un segredo en calquera ámbito" e, polo tanto, as "circunstancias que se deron no ano 1978 hoxe en día serían moi difíciles". Esta situación atribuíuna á "inmediatez" dos medios e a "falta de discreción en moitos aspectos por parte de todos" -dixo incluíndose-, o que faría "moi difícil de manter" esas circunstancias.

De novo na súa alocución ante os presentes, o delegado do Goberno tampouco pasou por alto que "cambiaron os tempos" e "non sempre" cara ao "óptimo". Así, destacou que se no pasado se fixo historia por derrubar muros", agora é ó "contrario". Por iso, arremeteu contra o aumento, paso a paso, "dun deslizamento" cara ao lado contrario (de eliminar barreiras) e do "auxe de ideoloxías autoritarias e do terrorismo", nun momento marcado pola convulsión electoral en varios puntos do planeta.

Pero neste escenario, Villanueva remarcou que a Constitución "está plenamente vixente", sen prexuízo de que, "de forma pausada" póidase avanzar nunha reforma, pero "sempre con respecto ao Estado de Derecho.

No acto, no que estivo o presidente do Parlamento, Miguel Santalices, e o vicepresidente da Xunta, Alfonso Rueda; e a alcaldesa accidental, María García Gómez, tamén se entregaron as condecoracións e recoñecementos a membros dos corpos de seguridade.

"É precisamente o cumprimento desta tarefa nun grao de alta esixencia a que hoxe trouxo a estes once axentes da Garda Civil e de Policía Nacional a este estrado", resaltou Villanueva, en referencia aos condecorados, tras destacar que a "seguridade é un dos piares sobre os que se está a construír a España do século XXI" e permite o "exercicio dos dereitos constitucionais, misión primaria dos corpos de seguridade".

CONDECORACIÓNS

Foron condecorados coa Encomenda de número da Orde do Mérito Civil o xefe da comisaría provincial da Coruña, José Luis Balseiro Vigo; e o xefe de Brigada Provincial de Policía Xudicial da Coruña, Francisco Javier Gudiña Pérez.

Coa Encomenda da Orde do Mérito Civil: inspector xefe e xefe de sección operativa de Seguridade e Protección da Unidade da Policía Nacional Adscrita de Galicia, Antonio Fernández Criado; o inspector xefe da Brigada Provincial de Seguridade Cidadá da Coruña, Fernando Pico López; e o inspector xefe, xubilado, da Unidade da Policía Nacional Adscrita á Comunidade Autónoma, Antonio Riádigos González.

O coordinador de Servizos adscrito á Comisaría Provincial da Coruña, José Eugenio Fernánddez Barallobre, foi galardoado coa Cruz de oficial da Orde do Mérito Civil; e o subinspector do equipo de resposta policial da Unidade de Policía Nacional Adscrita á Comunidade Autónoma, Fernando Molina Flores, recibiu a Cruz da Orde ao Mérito Civil.

Coa Cruz de prata da Orde do Mérito Civil foron condecorados: Manuel Ángel Rico González, garda civil do posto de Ás Pontes; José Francisco Mouriz López, garda civil do destacamento de Tráfico da Coruña; e José Ramiro Taboada Quintana, policía xubilado da sección de seguridade da Unidade de Policía Nacional adscrita á Comunidade Autónoma.

Finalmente, Alfonso Paz Platas, garda civil do 1º subsector de tráfico de Galicia, recibiu a Medalla ao mérito de Seguridade Vial na súa categoría de Bronce con distintivo azul.

Ademais das autoridades mencionadas, tamén participaron no acto o xeneral xefe da Forza Loxística Operativa, Francisco Javier Sánchez Fernández; o xeneral xefe da XV zona da Garda Civil, Anxo Alonso Miranda, e o xefe superior da Policía de Galicia, Manuel Vázquez López, entre outras autoridades civís e militares.