Por Galicia Confidencial | Santiago de Compostela | 06/12/2016 | Actualizada ás 14:47
O anuncio do novo Ministro de Fomento dunha nova reunión non contenta as vítimas do Alvia. “Levamos tres anos de loita e iso só son palabras”, declarou hoxe un dos voceiros da asociación Plataforma Víctimas Alvia 04155.
Boas palabras que quedan en nada
Arturo Domínguez, en declaracións a Radio Galicia, dixo que se non hai medidas máis alá que montar outra reunión “será un engano máis as vítimas”. O ministro Íñigo de la Serna esquivou polo de agora responder a unha das grandes reclamacións das vítimas: unha comisión no Congreso dos Deputados que investigue o papel da administración no descarrilamento.
Durante a súa visita ao país este luns, o mandatario do PP limitouse a dicir que el pensa "dar prioridade absoluta ás familias" para poder atendelas, polo que prevé manter un encontro cos afectados antes de que finalice o ano. Nin unha palabra sobre a comisión de investigación, malia que cando era alcalde de Santander prometera formalmente apoiala, como lle volveron a recordar o martes os afectados.
Ante este regate dialéctico, Domínguez non ve cambios coa postura respecto da anterior ministro. “Parecía o mesmo mantra que o de Ana Pastor, repetir unha vez iso de ‘estou coas vítimas e imos colaborar’, pero logo nada diso é verdade”. É máis, na súa opinión, este tipo de declaracións “o único que fan é engadir máis sufrimento”.
Comparecencia no Europarlamento en xaneiro
Mentres o caso segue atoado nos xulgados -coa colaboración da Xunta que acaba de poñer pegas ao soldo do novo perito independente-, a Plataforma continúa a loitar na fronte política. Así, lograron seren invitados a comparecer na Eurocámara en xaneiro.
En concreto, os afectados expoñerán as súas denuncias na comisión de Peticións do Parlamento Europeo, debido a que o PSOE se uniu finalmente a petición dos grupos de Los Verdes-ALE (onde participa a deputada galega Lidia Senra de AGE) e GUE-NGL (onde colabora Ana Miranda do BNG). As vítimas denunciarán en Bruxelas ao Estado español por incumprimento da normativa e publicidade enganosa. Cómpre lembrar que foi o ditame europeo, alertando de que non se fixera unha investigación independente, o que contribuíu a que a instrución do preito tivese que volver á primeira fase, despois de que a Xustiza exculpase a todos menos ao maquinista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.