Emigración invita aos galegos de Madrid a "perseverar e afondar no camiño da mutua colaboración"

O secretario xeral da Emigración, Antonio Rodríguez Miranda, compartiu este sábado o V Nadal Galego de Madrid con membros das distintas entidades e comunidades galegas con presenza na capital española e provincia.

Rodríguez Miranda animou aos galegos de Madrid a "perseverar e afondar no camiño da mutua colaboración entre centros galegos e asociacións sectoriais", no que "foron pioneiros", segundo recordou.

O evento, un ano máis, foi organizado polo Club de Xornalistas Galegos en Madrid, que preside Pilar Falcón, en colaboración coas entidades e asociacións de galegos na capital, tanto sectoriais como centros galegos, integrados na Federación de Asociacións Galegas en Madrid (Fagama), e a propia Secretaría Xeral da Emigración.

"As e os galegos de Madrid fostes pioneiros e punteiros e así cumpre recoñecelo, en unir esforzos, e de facelo ademais entre asociacións xeralistas e sectoriais, algo que é moi difícil de ver fose de aquí", resaltou o secretario xeral da Emigración. "En nome de Galicia e do seu Goberno, quero e debo recoñecérvolo", abundou.

Así mesmo, asegurou que "esa unión é especialmente boa para Galicia por darse onde se dá: en Madrid", segundo abundou, "capital da nación e epicentro das grandes decisións nese ámbito". "Galicia ten peso no conxunto de España, en boa medida, grazas a vós", sentenciou.

Este V Nadal tivo lugar na Casa de Galicia en Madrid, coa presenza do seu director, José Ramón Ónega. Na parte artística, a organización contou coa colaboración do coro da asociación Xuntanza de Galegos de Alcobendas e dun espectáculo-concerto de Bruxo Queiman e Andrea Pousa.

A axenda do secretario xeral da Emigración levoulle, ademais, previamente á Casa de Galicia de Alcorcón, onde visitou a socios e instalacións da entidade que preside Miguel Fernández Arias.

Segundo os datos de Emigración, na Comunidade Autónoma de Madrid residen, segundo rexistros do Instituto Nacional de Estatística a 1 de xaneiro deste ano, 78.040 galegos de nacemento censados.