Un libro para ler de tres xeitos diferentes
Bolanda acaba de editar un novo libro de Concha Blanco, a coñecida pedagoga e autora ceense. DO RE MI FAntasía está pensado para o público infantil e xuvenil e trátase dunha obra moi especial porque pode ser lida de diferentes maneiras en función do interese e das capacidades dos cativos..
Por GC Tendencias | Santiago de Compostela | 13/12/2016 | Actualizada ás 10:56
Así, Bolanda explica que “os amantes da poesía poderán ler este libro en verso, saltando as partes en prosa; os que gustan máis dos relatos só teñen que omitir as poesías, e aqueles que gusten de ambas as dúas poderán ler o libro de principio a fin, alternando prosa e verso”. Trátase pois dun libro moi divertido para ler e reler con nenos de diferentes idades, o que o converte nunha boa opción para os agasallos de Nadal.
Olaya Naveira encárgase das ilustracións deste volume de 48 páxinas editado en tapa dura e cuxo prezo nas tendas en liña ronda os 16 euros. Naveira tamén se encargara no seu día de ilustrar Lobishome, reinterpretando o imaxinario de Blanco.
Concha Blanco é unha das autoras máis prolíficas da literatura infantil e xuvenil en galego. Profesora xubilada, xornalista e pedagoga, acumula numerosos premios, como o Frei Marín Sarmiento ou o de Novela por Entregas de La Voz de Galicia.
