Irmandade, eleccións, alburgada, porcoril, populismo e xenofobia, candidatas a Palabra do Ano
A Real Academia Galega e a Fundación Barrié lanzan un ano máis a campaña do Portal das Palabras para escoller cal é o termo que mellor define o ano que remata.
Por Galicia Confidencial | Santiago de Compostela | 15/12/2016 | Actualizada ás 16:30
«Irmandade», «eleccións», «alburgada», «porcoril», «populismo» e «xenofobia» son os seis termos finalistas que optan a se converter na Palabra do Ano 2016 nunha votación na que pode participar toda a cidadanía dende este xoves e que se manterá aberta ata o 22 de decembro desde esta ligazón.
A campaña do Portal das Palabras lanzada para escoller cal é o termo que mellor define os doce meses a piques de rematar recibiu na primeira fase case duascentas propostas diferentes achegadas por mil catrocentos usuarios.
O equipo do Portal das Palabras, iniciativa da Real Academia Galega e da Fundación Barrié, escolleu estes seis termos entre todos os recibidos atendendo a tres criterios: cales son os máis populares, cales tiveron unha maior proxección pública ao longo de todo o ano e aqueles destacados ben pola súa carga significativa, ben pola súa construción morfolóxica.
«Irmandade» figura entre as palabras finalistas xusto no ano no que se celebra o centenario das Irmandades da Fala, movemento nado na Coruña en 1916 que desenvolveu un labor esencial para a dignificación da lingua galega.
«Eleccións» recorda os sucesivos procesos electorais que se celebraron ao longo deste ano, no que tamén se ten falado decote de populismo.
«Alburgada» refírese a unha mentira disfrazada de verdade –unha boa proposta de adaptación ao noso idioma do neoloxismo posverdade–.
«Porcoril», termo de recente creación, refírese a un cruzamento entre porco e xabaril.
«Populismo» fai mención a unha práctica política en alza que ten triunfado en países como Estados Unidos, coa vitoria de Donald Trump; no Reino Unido, co triunfo do Brexit; ou en Francia, co auxe da extrema-dereita.
Precisamente vinculada ao populismo foi moi recorrente este ano a palabra «xenofobia», a hostilidade contra o que vén de fóra.
O Portal das Palabras é un proxecto da Real Academia Galega e a Fundación Barrié para a modernización do traballo lexicográfico e a popularización da nosa lingua. O traballo conxunto entre ambas as institucións permitiu tamén levar a cabo as últimas actualizacións do Dicionario da Academia, cunha interface máis personalizada e interactiva, e o desenvolvemento de aplicacións para empregalo desde teléfonos móbiles e tabletas con sistemas iOS e Android.
En 2014 foi elixida Palabra do Ano «corrupción» e en 2015, «refuxiados».
