25 concellos lanzan un plan contra o eucalipto
A Reserva da Biosfera Terras do Miño alerta da “ameaza con crebar o equilibrio ecolóxico dos montes” e promeverá a plantación de Soutos. A Xunta xa hai un ano que tamén anunciou restricións.
Por Galicia Confidencial | Lugo | 17/12/2016 | Actualizada ás 13:30
Os órganos de xestión da Reserva da Biosfera Terras do Miño aprobaron este venres un plan contra o eucalipto e a prol dos castiñeiros “que permiten un aproveitamento económico máis sustentable e mesmo máis rendible ca o eucalipto”.
O Plan inclúe un programa de sensibilización sobre “os efectos nocivos do eucalipto nos recursos hídricos” e a promoción de alternativas económicas a árbore pirófila. Entre elas están actividades de formación para profesionalizar a plantación de soutos de castiñeiros e outras especies arbóreas.
Tamén se aprobou unhas xornadas técnicas para estudar o impacto ambiental e económico da proliferación de plantacións de eucalipto na Reserva da Biosfera. En opinión da Reserva, o eucalipto segue a expandirse e “ameaza con crebar o equilibrio ecolóxico dos montes lucenses”.
O plan da Xunta non dá arrancado
Deste xeito outra administración dá novos pasos contra este especie. A Xunta tamén anunciou hai un ano un decreto para limitar a súa extensión, pero polo de agora non concretou as medidas. Segundo informou Campo Galego, tras todo este tempo a Xunta entregoulle ao sector unicamente un primeiro borrador do texto, que inclúe restricións ás plantacións.
O Goberno Galego tamén ten en marcha tamén programas de axudas para a reforestación do monte con outras especies. Con todo, a Consellería de Medio Rural acostuma a resolver as convocatorias nos últimos meses do ano, o que na práctica impide que moitas das plantacións se poidan facer e se perdan millóns de axudas, partes procedentes da UE.
A Pastoriza, Abadín, Alfoz, Baralla, Begonte, Castro de Rei, Castroverde, Cospeito, Friol, Guitiriz, Guntín, Láncara, Lugo, Meira, Mondoñedo, Muras, O Corgo, O Páramo, O Valadouro,Ourol, Outeiro de Rei, Pol, Rábade, Riotorto, Vilalba e Xermade son os concellos que forman parte na Reserva, que preside a Deputación de Lugo.
Apoio á protección do Pedregal de Irimia
Por outra banda, o órgano de participación de Reserva da Biosfera Terras do Miño vén de sumarse á campaña a prol da conservación do Pedregal de Irimia.
Situado na serra de Meira, o Pedregal de Irimia é un enclave hidrográfico de especial valor cultural, paisaxístico e xeomorfolóxico, que se atopa ameazado pola plantación de eucaliptais na súa contorna.
