Por Galicia Confidencial | | 21/12/2016 | Actualizada ás 20:45
Hai uns días, as entidades LGBTI galegas enviaron un escrito á Consellería de Educación e á Valedora do Pobo para alertar do envío dun panfleto homófobo aos centros educativos e anunciaban a posibilidade de denunciar este feito ante o Ministerio Fiscal. Agora é o PSdeG, a través do eu portavoz de Educación, Luis Álvarez Martínez, quen presentou unha batería de iniciativas parlamentarias para reclamarlle á Xunta que prohiba o reparto nos centros educativos desta publicación.
Unha iniciativa que chega logo de detectar a distribución nos centros de ensino dun texto dunha organización ultraconservadora contra as leis para a igualdade LGTBI. O texto difundido, advirte, “pretende crear unha alarma inxustificada deostando con argumentos ideolóxicos e discriminatorios á comunidade LGTBI, á que acusa de querer causar un grave dano ao alumnado”. O folleto, distribuído baixo o título “Sabes o que lle queren ensinar aos teus fillos no colexio?”, e asinado por Hazte Oir, “ataca duramente á educación no respecto á diversidade sexual e de xénero”.
Álvarez alerta das afirmacións da dita publicación, que ataca á “proliferación” de leis autonómicas “que buscan impoñer na sociedade a ideoloxía de xénero” e cos que os gobernos “adhírense á corrente ideolóxica defendida polos lobbies do feminismo radical e LGTBI”.
Os socialistas galegos presentaron unha batería de iniciativas parlamentarias reclamando que o Goberno galego prohiba o reparto nos centros educativos da comunidade autónoma, tanto públicos como privados, “de calquera publicación que poña en cuestión a igualdade das persoas e, nomeadamente, aquelas que supoñan un cuestionamento das políticas de igualdade de trato e non discriminación por motivos de orientación sexual”.
Máximo rexeitamento
O responsable socialista amosa a súa “fonda preocupación e máximo rexeitamento” a esta propaganda “contraria aos valores contidos no noso ordenamento xurídico, de tolerancia, respecto á diversidade e a non discriminación”. Traslada a súa confianza no traballo do profesorado para desenvolver unha educación en valores en defensa destes principios, e lembra que o alumnado LGTBI “é un dos que máis sofre o acoso escolar”.
Os socialistas galegos consideran “imprescindible que se cumpran todas as medidas legalmente establecidas para garantir o benestar das nenas, nenos e novos LGTBI nos colexios e institutos”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.