Feijóo sobre os cargos do Sergas imputados: “Non imos cesar a ninguén por cumprir co seu traballo”
No novo auto sinálase que a súa actuación "está unida a que a celeridade da decisión incidía directamente na posibilidade de curación ou de supervivencia dos pacientes de serlles administrado o fármaco solicitado". Pero para o presidente da Xunta a nova decisión xudicial “protexe o dereito dos investigados”.
- A Audiencia Provincial pide investigar por homicidio a cargos do Sergas polo tratamento da Hepatite C
- O PPdeG rexeita que Feijóo compareza sobre cargos do Sergas investigados polos fármacos da hepatite C
Por Xurxo Salgado | Compostela | 29/12/2016 | Actualizada ás 14:30
A Xunta e o seu presidente, Alberto Núñez Feijóo, seguen insistindo na defensa pecha dos dous altos cargos do Sergas investigados polas mortes de afectados pola Hepatite C. “Non imos cesar a ninguén por cumprir co seu traballo”, dixo o xefe do Executivo galego este xoves ao ser preguntado sobre se vai cesar a estes dous altos cargos tras estimar a Audiencia Provincial da Coruña o recurso da Fiscalía que acordou chamalos a declarar tamén como investigados por un suposto delito de homicidio en seis dos oito casos que inclúe a causa.
A investigación trata de aclarar se houbo un atraso ilícito na avaliación de pacientes con Hepatite C, necesaria para que puidesen recibir os tratamentos. Os cargos que xa foron citados -o pasado 28 de abril- son o xerente da área sanitaria viguesa, Félix Rubial, entón director de Asistencia Sanitaria, e a subdirectora de Farmacia, Carolina González-Criado. O xuíz decidiu investigalos por prevaricación, aínda que a Fiscalía lles atribuía tamén un suposto delito de "homicidio por imprudencia profesional grave" ao atrasar a administración dos fármacos "por razóns presupostarias", situación que agora estima a Audiencia Provincial.
Con todo, e a pesar do auto xudicial, Feijóo insiste en defender a estes altos cargos. De feito, incidiu en que os médicos do Sergas “están para axudar sempre aos pacientes” e non se amosa nada preocupado polo acontecido. “Sobre o auto non teño ningunha preocupación. É coherente, garantista e explícito”, dixo o presidente da Xunta na rolda de prensa posterior ao Consello da Xunta.
O presidente galego mesmo criticou aos medios por interpretar a sentenza de xeito errado. “Hai que clarificar bastantes cousas”, dixo ao suliñar que o xuíz o que fai é “protexer os dereitos dos investigados e non se pronuncia sobre o fondo da cuestión”. É dicir, que o auto pouco máis que vai “en beneficio” dos investigados. “Di que non existe base obxectiva ou médica da situación causal entre os falecementos e o atraso da medicación”, insistiu Feijóo.
“ACTUACIÓN SUPOSTAMENTE IRREGULAR”
Con todo, no auto xudicial, "revógase parcialmente" o auto ditado polo Xulgado de Instrución número 3 de Santiago, que titula Andrés Lago Louro, e acorda "que se teña por dirixido o procedemento fronte aos denunciados por un delito de homicidio imprudente" con respecto a seis pacientes e que "se lles tome declaración como investigados en relación" aos falecementos dos enfermos.
A decisión xudicial, consecuencia dun recurso de apelación interposto polo Ministerio Fiscal, sinala no auto que a "transcendencia" da actuación administrativa, supostamente irregular, "está unida a que a celeridade da decisión incidía directamente na posibilidade de curación ou de supervivencia dos pacientes de serlles administrado o fármaco solicitado".
Así, apunta que resulta "inadecuado" que, por un lado, se estime que a actuación dos dous cargos investigados pode ser delituosa por "supostamente obstaculizar que os pacientes recibisen un tratamento" e, ao mesmo tempo, consideralos alleos ás consecuencias desa ausencia de tratamento ou a subministración tardía (o falecemento en seis dos oito casos incluídos pola Fiscalía).
