Por Galicia Confidencial | Santiago de Compostela | 05/01/2017 | Actualizada ás 09:15
A Modern Language Association of America (MLA) —a maior asociación de académicos da lingua no mundo— celebra na cidade estadounidense de Filadelfia, do 5 ao 8 de xaneiro, a súa tradicional Convención Anual, na que a lingua galega volve reafirmarse tras ser incluída en 2014 nos programas desta institución. Desta vez, son tres as sesións dedicadas ao galego.
O venres 6 de xaneiro, na sesión 214, titulada What Is "Galician" in Galician Studies? (Que é "galego" nos estudos galegos), participan Antón Figueroa (Universidade de Santiago de Compostela), Alex Alonso (Brooklyn College da CUNY) e Gabriel Rey-Doval ( University of Wisconsin-Milwaukee).
O sábado 6 celébranse dúas sesións con presenza galega. A 621, dedicada á tradución, co título Translational Encounters in Galician Studies: Contemporary Literature across Transnational Borders, será coordinada por Olga Castro, experta en tradución galega que traballa en Aston (Birmingham, Reino Unido).
Por último, a sesión 634, sobre a estandarización do galego, co título The Standardization of Galician: A Response to Language Maintenance and Change in Languages in Contact, participarán Rosario Álvarez, Francisco Dubert e Xulio Sousa (os tres do Instituto da Lingua Galega, da Universidade de Santiago de Compostela), ademais de María Rey López, da Denver Metropolitan University.
O GALEGO NA MLA
O 13 de novembro de 2014, a Modern Language Association (MLA), a través da súa directora executiva, Rosemary G. Feal, fixo pública a aprobación definitiva do Foro Galician Language, Literature and Culture (LLC) no seo da súa organización. Con esta decisión, a lingua, literatura e cultura galegas integráronse no organigrama da MLA, en pé de igualdade coas demais linguas, literaturas e culturas do mundo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.