Marín suma por fin no derbi

Ficha técnica
Marín Peixe Galego 73: José Simeón (6), Tim Derksen (19), Javi Múgica (8), Gregorio Adón (9), Jason Cain (17) -cinco inicial- Manu Ferreiro (6), Albert Homs (2) e Marc Bauzá (6).
Leyma Coruña 67: Joan Creus (4), Ángel Hernández (5), Dago Peña (15), Javi Lucas (6), Gediminas Zyle (7) -cinco inicial- Sergio Olmos (5), Zach Monaghan (18), Djuran (0), Sabonis (5), Larry Abia (0) e Mikulic (2).
Parciais: 22-15, 16-15 (38-30); 21-25 (59-55), 14-12 (73-67).
Árbitros: José María Terreros San Miguel e Francisco Bravo Loroño. Eliminaron por cinco faltas persoais a Jason Cain.
Incidencias: partido da 19ª xornada da LEB Ouro nun ateigado pavillón da Raña, con presenza de medio cento de afeccionados laranxas.

Sorprendeu Marín coa súa intensidade defensiva a Leyma, que tivo ademáis un pésimo día no tiro exterior (6/30 en triplas), e os coruñeses quedáronse en tan só 67 puntos. Despois de oito derrotas consecutivas e malia as baixas de Mario Cabanas e Andrés Miso, o Peixegalego gañou o derbi ante Básquet Coruña por 73-67 e sumou unha máis que necesaria vitoria, a cuarta da tempada, na súa loita pola permanencia. Os de Tito Díaz suman 11 vitorias e oito derrotas.

Foron igualados os primeiros minutos na Raña, coas defensas impoñéndose os ataques e pouco acerto no tiro, e o marcador estaba an 12-11 tras seis minutos. Ángel Hernández puxo por diante a Leyma cunha tripla (12-14), pero Marín pechou o primeiro cuarto cun parcial de 10-1, tras dúas triplas de Tim Derksen e Manu Ferreiro. Tralos dez primeiros minutos, 22-15.

Marín apertaba en defensa e Leyma non era quen de impoñer o seu ritmo de xogo, e unha tripla de Jason Cain puxo oito arriba aos locais: 29-21. Tito Díaz parou o partido a seis minutos do descanso, pero os coruñeses estiveron case tres sen anotar. Fixo Monaghan un 2+1 e foi Marín quen pediu tempoo con 30-26. Cain e Derksen anotaron para os locais, e Tito Díaz pediu un novo tempo. No lecer, 38-30 para o Peixegalego.

Jason Cain, ex do Leyma, anotou un 2+1 e Adón unha tripla, e outra máis dende 6,75 para Cain, e Marín acadou a máxima diferenza do partido: 47-34. Os locais seguían intensos en defensa e aproveitaban os contactos, e Tito Díaz recibiu unha técnica por queixarse dunha falta sobre Monaghan. Dez arriba (55-45) e tempo morto do técnico coruñés. Leyma meteuse no partido con sete puntos consecutivos de Dago Peña. 59-55 con dez minutos por xogar.

Erros e precipitacións nos dous equipos e un parcial de 3-4 en cinco minutos (62-59). Derksen anotou de tres, pero Monaghan respostou cun espectacular 3+1 para achegar a Básquet Coruña (65-63), que errou varios ataques para poñerse por diante. Marín non viu aro ata que Javi Múgica anotou dende cinco metros (67-64). Leyma errou dos tiros libres (Monaghan e Zyle) decisivos, e Tim Derksen e Javi Múgica con catro tiros libres sentenciaron o derbi. Ao final, 73-67. “Puido caer para os dous lados, pero mereceron gañar”, sentenciou o mestre Tito Díaz.