Por gcdeportes | Compostela | 10/01/2017 | Actualizada ás 09:04
No estadio Alvalade, no descanso do partido entre Sporting e Feirense, presentouse o equipo ciclista Sporting-Tavira. Entre os corredores que recibiron os aplausos dos 40.000 leões, dous galegos: os estradenses Álex Marque e Óscar González Brea, que volven coincidir coas mesmas cores (Efapel 2015).
Álex Marque, de 35 anos e gañador da Volta a Portugal no 2013, é unha das catro caras novas do Sporting-Tavira para esta tempada. Xunto ao veterano ciclista estradense, procedente do LA Alumínios-Antarte, reforzan o equipo lisboeta as fichaxes de Joni Brandão (Efapel), Frederico Figueiredo (Rádio Popular-Boavista) e Fábio Silvestre (Leopard). Marque regresa a un club co que xa competiu hai varias campañas, cando aínda se denominaba Palmeiras Resort Tavira.
Deste xeito, o equipo dirixido por Vidal Feitas ficha a tres corredores que remataron a pasada Grandíssima no top-15: Joni Brandão 5º, Figueiredo 11º e Álex Marque 13º. O resto do equipo continúa da tempada pasada, entre eles o tamén estradense Óscar González Brea (24 anos, segunda tempada) e o que foi o seu xefe de filas no 2016, o italiano Rinaldo Nocentini.
O Sporting-Tavira confía nas súas novas fichaxes para dar un salto de calidade e tentar disputar o dominio no pelotón portugués ao intratábel W52-FC Porto do arousán Gustavo Veloso, gañador da Volta no 2014 e 2015 e segundo malia tres etapas gañadas no 2016. No W52-FC Porto militan outros dous galegos: o porriñés Jacobo Ucha e o cambadés Ángel Sánchez.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.