O Grupo Voz despraza a Fernanda Tabarés de V Televisión para dirixir Voz Audiovisual
O obxectivo destes cambios, segundo o grupo, é “consolidar a aposta pola calidade nos produtos para TVG e a apertura a mercados nacionais e internacionais, continuando a senda iniciada con El final del Camino”.
- La Voz inicia unha reestruturación da súa división audiovisual
- La Voz asume varios millóns de perdas cada ano para manter V Televisión
Por Galicia Confidencial | A Coruña | 12/01/2017 | Actualizada ás 11:52
Fernanda Tabarés, ata agora directora da canle televisiva do Grupo Voz, V Televisión, pasará, a partir do luns a dirixir a produtora da Corporación Voz de Galicia, Voz Audiovisual, en substitución de Carlos Carballo, que estivo ao fronte desta división nos últimos nove anos.
Tal e como xa avanzou GC, o Grupo Voz leva meses preparando cambios na súa división audiovisual. Tras o peche estrela do programa de V Televisión, Via V, que dirixía, precisamente, a propia Tabarés, augurabanse novas mudanzas na canle de televisión que é deficitaria para o Grupo Voz. Polo momento, non se deu a coñecer o nome do substituto ou substituta de Tabarés en V Televisión, aínda que as fontes consultadas apuntan a que o grupo coruñés acabará pechando a canle.
Segundo apunta La Voz de Galicia, os cambios en Voz Audiovisual “pretenden consolidar a aposta pola calidade nos produtos para Televisión de Galicia e a apertura a mercados nacionais e internacionais, continuando a senda iniciada coa serie El final del Camino –inaugurada este mércores--”.
Fernanda Tabarés estará acompañada por Paula Fernández González, directora de Produción de Voz Audiovisual; Alberto Guntín, director de Desenvolvemento, e Ángel Noya, director técnico. Pola súa banda, Carlos Carballo pon fin a un ciclo de nove anos á fronte de Voz Audiovisual, nos cales se cultivaron importantes éxitos na produción de series de ficción, como Matalobos, Serramoura ou Pai Casares. Durante a súa etapa á fronte de Voz Audiovisual creouse a Escola de Ficción.
