A Xunta activa o sistema de prealerta por seca en Galicia
Os encoros galegos teñen un 11% menos de capacidade que nunha situación normal e decembro foi un dos meses máis secos en décadas. “Non hai que temer porque o subministro de auga está garantido”, di o presidente da Xunta.
Por Xurxo Salgado | Santiago de Compostela | 12/01/2017 | Actualizada ás 14:32
Galicia, o país dos mil ríos e da paisaxe verde curtida pola auga, sofre unha longa seca. Tanta, que a Xunta decidiu xa activar o sistema de prealerta ante a posibilidade de que a situación se manteña e empeore. Polo momento, e segundo apuntou o presidente galego, a situación non é alarmante, pero o certo é que os baixos índices de chuvia están provocando que os encoros estean case en mínimos históricos.
De feito, a media do volume dos encoros é un 11% menor que a súa media habitual e o caudal dos ríos é moi baixo o que impide que se enchan. O índice de chuvia en decembro foi, ademais, inferior á media histórica e volveu marcar outro mínimo histórico.
Pero o máis preocupante é o estado dos ríos e os seus caudais, así como os acuíferos suberraneos. “Son máis baixos que outros anos o que está provocando que non se recarguen os encoros”, dixo Alberto Núñez Feijóo na rolda de prensa posterior ao Consello da Xunta. En todo caso, o presidente galego quixo enviar unha mensaxe de “tranquilidade” porque, insistiu, o abastecemento, polo momento, “está garantido”.
En todo caso, e “por precaución”, a Xunta activou o sistema de prealerta por seca, ante a posibilidade que o inverno tamén sexa máis seco do normal. Por iso, vanse intensificar os controis de encoros e activar a oficina técnica da seca para o seguimento da situación. Ademais, a Xunta xa ten activadas campañas de promoción responsable da auga
