Por Galicia Confidencial | Lugo | 14/01/2017 | Actualizada ás 22:00
Juan Carlos Piñeiro será o vindeiro líder de Compromiso por Galicia (CxG). Foi o único que se presentou como candidato á Secretaría Xeral ao II Congreso Nacional desta formación que se celebrará o 21 de xaneiro e que se considera xa como un congreso refundacional tras a baixa de numerosos militantes nos últimos tempos.
Piñeiro é técnico en mantemento industrial e en prevención de riscos laborais e foi candidato nas pasadas eleccións autonómicas pola provincia de Lugo. Tamén foi concelleiro do PSdeG en Cervo, dende 2000 a 2003, secretario xeral de UGT na Costa Lucense desde 2005 a 2013 e candidato de CxG á alcaldía de Burela en 2015.
“Este é un proxecto necesario para o país e o futuro de Compromiso está aínda por escribir”, indicou Piñeiro Docampo que se amosouse animado ante esta nova etapa. O seu obxectivo é “asentar o crecemento territorial da nosa estrutura” ante o reto das vindeiras eleccións municipais de 2019, nas que está convencido de que a formación galeguista “será a sorpresa”.
43 CANDIDATURAS
O nome de Piñeiro deuse a coñecer no Consello Político Nacional de Compromiso por Galicia que se celebrou este sábado e no que tamén se deu conta das enmendas presentadas ós tres documentos de debate, o de Política, o de Estratexia e o de Estatutos.
Tamén se validaron as candidaturas presentadas ao Consello Político Nacional, composto por 30 persoas(15 mulleres e 15 homes). Presentáronse un total de 43 candidaturas. Destaca a presenza de moitas persoas novas polo que a idea de renovación e “reinicio” queda totalmente acreditada.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.