Divisións na plataforma de defensa da Ría de Cedeira

ADEGA e o colectivo cívico Somos Cedeira deixarán de participar na Plataforma da Ría de Cedeira por entender que se desvía dos obxectivos para os que foi constituída.

A través dun comunicado, ADEGA lembra que a súa postura fronte o soterramento indiscriminado das praias galegas, foi sempre “investigar cales son as causas da desaparición de area e atallar esas causas”. “Sempre se manifestou en contra do soterramento indiscriminado polo custosa que é esa medida e polas graves consecuencias mediambientais que estas intervencións teñen”, indicou.

Precisamente, estas foron as razóns que impulsaron a creación da plataforma en defensa da Ría de Cedeira, para acadar unha xestión máis ecolóxica do entorno da praia e da ría de Cedeira. De feito, a entidade ecoloxista lembra que ese foi o leitmotiv da constitución desta plataforma foi o de esixir que se realizase un estudo de impacto ambiental “antes de acometer custosas intervencións, para poder coñecer a efectividade das intervencións e o impacto que producen sobre a reserva mariña”.

Tanto ADEGA como SomosCedeira veñen reclamando este estudo dende o ano 2014, no que despois dunha serie de fortes temporais se deitou area en moitas praias galegas. Sen embargo, a Demarcación de Costas non quere realizalo, a pesar de que se pediu dende o ano 2001.

“O último acordo da plataforma de propoñer o retranqueo da praia, sen ningún tipo de estudo previo, alónxase desa idea coa que se constituíu a plataforma e que a cidadanía de Cedeira leva 16 anos reivindicando. Se realmente esta plataforma vai propoñer intervencións na praia sen o correspondente Estudo de Impacto Ambiental (EIA), non ten sentido que ADEGA e SomosCedeira sigan participando nela, posto que vai en contra dos valores que defenden”, din para defender a súa saída da mesma.