CxG quere “relanzar” este partido “renovando o galeguismo”
O seu secretario nacional destaca que hoxe en día Compromiso representa o “galeguismo máis organizado e o de maior implantación do país”.
Por Galicia Confidencial | Compostela | 18/01/2017 | Actualizada ás 09:20
“Renovando o galeguismo.Nova organización.Novas accións”. Este será o lema do II Congreso Nacional que a formación Compromiso por Galicia celebrará o vindeiro sábado 31 de xaneiro en Teo.
O secretario nacional de organización de Compromiso por Galicia, Manoel Vello, destacou que este “será o conclave máis importante de Compromiso desde a súa constitución” e suliñou o feito de que suporá “o relanzamento do partido” despois de catro anos de existencia e da reconfiguración do seu “corpus militante”.
En relación co lema congresual, o secretario de organización apelou á necesidade de renovación. “Levamos moitos anos sen un galeguismo organizado”, dixo e indicou que hoxe en día Compromiso, con dúas alcaldías significativas e uns trinta concelleiros, representa "o galeguismo máis organizado e o de maior implantación do país".
Vello salientou que entre os 41 candidatos e candidatas ao Consello Político Nacional hai moitas caras novas que, dixo, “certifican esta nova singradura política”. Os congresistas votarán tamén unha nova cara para a secretaría xeral do partido, á que só presentou candidatura Juan Carlos Piñeiro.
Desde Compromiso tamén se destacan as emendas que se debaterán nesta cita e que “marcarán o futuro do partido” e que foron presentadas pola militancia ós documentos de Política, Estratexia e Estatutos.
Neste segundo Congreso Nacional estará presente unha delegación do Euzkadi Buru Batzar(EBB), a executiva do Partido Nacionalista Vasco.
