Por Galicia Confidencial | Ferrol | 19/01/2017 | Actualizada ás 14:09
Os propietarios do mesón Irlanda, en Ferrol, impulsan, xunta coa propietaria do Café Zamora, de Zamora, unha denuncia colectiva contra o programa 'Pesadilla en la Cocina', que presenta o popular cociñeiro Alberto Chicote.
Esta denuncia podería tomar forma este xoves en Madrid, lugar onde os impulsores da denuncia teñen convocado a un grupo de 22 restaurantes que teñen participado no programa e que denuncian incumprimentos de contrato por parte de Warner Bros. International Television Production, a productora do programa que emite La Sexta.
Segundo recolle o xornal La Opinión de Zamora, os participantes nesta comida queren impulsar unha "asociación de afectados Pesadilla en la cocina". A iniciativa parte das donas doa restaurantea Irlanda de Ferrol e do Café Zamora, locais que protagonizaron dous episodios do programa de Alberto Chicote, un espazo dedicado a sacar de apuros a bares e restaurantes en problemas.
Os membros desta plataforma considéranse estafados polo programa de La Sexta xa que, segundo sinalan na Opinión de Zamora, sufriron "unha estafa" xa que a pesar de participar nas gravacións os seus locais non foron reformados nin se cumpriron as promesas de mellora. "Non se nos ensina nada de cociña e firmas un contrato que se incumpres xa che obrigan a pagar unha indemnización que che arruinaría toda a vida", explica a dona do restaurante Irlanda ao citado diario local.
Ameaza de denuncia
Warner Bros. International Television Production e La Sexta xa saíron en defensa do programa e do seu presentador, Alberto Chicote. "Tanto a cadea como a produtora estudan emprender as accións legais que sexan necesarias para restituír o inxustificado dano na imaxe de que se ocasionou", sinalan nun comunicado ambas as súas compañías.
"O fácil é botarlle a culpa á televisión, pero millóns de españois viron o excelente traballo que fai o programa e Alberto Chicote e así o valoran a maioría dos restaurantes aos que axudou o programa", apunta o comunicado de La Sexta e Warner Bros. International Television Production.
Críticas
O propietario do mesón Irlanda --durante un tempo Lembranzas por esixencias de Pesadilla en la Cocina--, José Manuel Gil, xa tiña criticado duramente ao cociñeiro e ao programa despois de saír en pantalla, o pasado outubro.Gil denunciou o incumprimento do pactado coa produtora, porque non lle instalaron a cociña comprometida. Tamén criticou os métodos que utiliza a productora xa que moito dos diálogos eran "seguindo un guión" e, no seu caso, unha graxa que aparecía na cociña "foi posta a drede".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.