Medio Rural e ao alcalde de Aranga levan os premios 'Dioxina' por fomentar o cultivo do eucalipto

A asociación ecoloxista Adega concedeu os seus premios 'Dioxina' 2016, ás "peores actuacións ambientais", á Consellería de Medio Rural e ao alcalde de Aranga, Alberto Platas.

Nun comunicado, a entidade anunciou que o premio Dioxina 2016 na categoría individual será nesta ocasión para Alberto Platas pola súa intención de "desprotexer o 9% do seu territorio, con importantes valores naturais, para dedicalo á plantación de eucaliptos".

Así mesmo, a categoría de colectivo deste galardón negativo é para a Consellería do Medio Rural "pola súa total entrega ao 'lobby' pasteiro enerxético e o abandono no cumprimento da lexislación, favorecendo intencionadamente o caos normativo arredor do eucalipto".

Por outra banda, o premio 'Osíxeno' de honra 2016 foi para o expresidente de Adega Ramón Varela Díaz, polo seu "compromiso coa defensa do ambiente e de Galicia fronte a agresións como nucleares e celulosas".

Finalmente, o galardón 'Osíxeno' colectivo recaeu na cooperativa de Ribeiras do Navia 'Ribeiregas', por "ir máis alá da produción ecolóxica" de alimentos e "contribuír co seu proxecto á revitalización das aldeas e a fixar poboación no rural".