En Marea esixe que o pacto pola Educación inclúa toda a comunidade educativa e non quede nos "despachos"

En Marea esixiu que o pacto pola Educación conte con todas as forzas sociais e non sexa unicamente un pacto de "despachos" xa que debe ter o respaldo de toda a comunidade educativa.

Así o esixiu o partido instrumental despois de que este venres a deputada Ánxeles Cuña se reunise con representantes da Plataforma en Defensa do Ensino Público de Galicia, que lle trasladaron a súa preocupación ante a "falta de diálogo real".

Deste modo, o covoceiro da plataforma, Lois Uxío Taboada, informou a En Marea da súa preocupación ao considerar que pode darse o caso de que "se chegue a un pacto das forzas políticas" nesta materia pero que "non coincida coa comunidade educativa".

Por iso, considerou necesario un acordo social paralelo e esixiron que se abra un "espazo real" de diálogo coa comunidade educativa "que se anuncia pero non se remata de concretar".

A plataforma tamén explicou a En Marea que valora a convocatoria dunha folga xeral educativa para o 9 de marzo por parte de todos os sectores (alumnado, familias e docentes) e en todas as etapas do ensino "no caso de que non se produza ningún avance por parte das institucións políticas".