Baixa en 2,1 días o tempo de espera para as intervencións cirúrxicas de prioridade un nos hospitais do Sergas

O tempo medio de espera para as intervencións cirúrxicas de máxima prioridade nos hospitais do Servizo Galego de Saúde (Sergas) descendeu en 2016 ata situarse nos 16,9 días, é dicir, 2,1 días menos que o ano anterior, cando se situaba nos 19.

Así o precisou aos medios o xerente do Sergas, Antonio Fernández-Campa, quen tamén explicou que este organismo centra o seu esforzo nas patoloxías de máxima prioridade. Neste sentido, celebrou que o tempo medio de espera para acceder a unha intervención cirúrxica se se padece algunha patoloxía de prioridade un se manteña por debaixo dos 30 días: "Mantémonos neste obxectivo e melloramos o dato".

Deseguido, recoñeceu, non obstante, que o tempo medio de espera para acceder a unha intervención cirúrxica se se padece unha patoloxía de prioridade dous se incrementou con respecto ao ano 2015 ata se situar nos 64,2 días en 2016. É por iso polo que o Sergas se puxo como meta para este ano 2017 traballar neste ámbito co propósito de reducir a espera.

A pesar deste dato, non obstante, o total da espera media -sumando todos os procesos- experimentou unha "significativa diminución" ata situarse en 2016 nos 68,3 días, o que supón 10,5 días menos que no ano 2015. Para este dato, indicou Fernández-Campa, inclúense todos os centros do Sergas, así como o Hospital de Povisa.

A este respecto, o xerente do Sergas sinalou que os datos sen ter en conta o hospital pontevedrés de Povisa serían "lixeiramente mellores", pois o tempo medio de espera total pasaría entón dos 68,3 días aos 67,5.

No que respecta ao rendemento cirúrxico acumulado, este alcanzou o nivel do 76,37 por cento, o que o sitúa por enriba do obxectivo marcado do 75 por cento.

TOTAL DE OPERACIÓNS

A actividade cirúrxica realizada nos hospitais do Servizo Galego de Saúde en 2016 superou, por primeira vez, as 200.000 intervencións. De feito, leváronse a cabo 204.725 -5.035 máis que en 2015-: 169.478 programadas -o 83 por cento- e 35.247 urxencias -o 17 por cento-.

Así mesmo, desas 204.725 intervencións cirúrxicas, Fernández-Campa sinalou que o 47 por cento realizáronse con ingreso do paciente -97.585--, mentres que o 53 foron ambulatorias -107.140-. Deste modo, considera positivo que se incrementara o peso das operacións ambulatorias respecto ás intervencións que requiren de ingreso.

Tamén celebrou que aumentaran as intervencións programadas e se reduciran as urxentes, diminuíndo estas últimas unhas 2.000 operacións.

CONSULTAS HOSPITALARIAS

Este 2016 realizáronse 5.003.022 consultas hospitalarias, case 100.000 máis que en 2015. De todas estas consultas, o xerente do Sergas destacou que un total de 86.596 foron non presenciais.

Deseguido, precisou que o tempo medio de espera para as primeiras consultas de enfermidade no hospital se situou en 47,3 días, o "menor da última década".

No que respecta ás probas diagnósticas, en 2016 realizáronse un total de 2.824.556 -31.348 máis que o ano anterior- e o tempo de espera medio foi de 85,7 días.

VÍAS RÁPIDAS

Ademais, fixo fincapé en que o Sergas está a traballar nas vías rápidas para poder atender aos pacientes con sospeita de patoloxía grave nun tempo medio de espera inferior a 15 días dende a derivación do médico de familia ao especialista do hospital.

En concreto, en 2016, beneficiáronse destes procedementos 13.345 persoas -1.624 máis que o ano anterior-, as cales esperaron, de media, 6,6 días.

ATENCIÓN PRIMARIA

O xerente do Sergas subliñou, ademais, que durante o ano pasado se realizaron 25.944.789 consultas en Atención Primaria, o que supón 331.670 máis que no anterior. Delas, 15.394 foron consultas médicas.

Así mesmo, destacou que, en 2016, o 99,85 por cento das citas telefónicas foron resoltos sen necesidade de acudir ao centro, e só o 0,15 por cento derivaron posteriormente nunha consulta presencial.

De igual modo, celebrou que esta modalidade de consultas ascendera a 2.266.349 -o 8,13 por cento do total-, o que supón un incremento de 400.329 máis que o ano anterior, é dicir, un aumento do 21,45 por cento.

Neste sentido, destacou o Programa Conecta 72, mediante o que se realiza un seguimento telefónico dos pacientes dados de alta dunha hospitalización. En concreto, os profesionais sanitarios fixeron o seguimento a 187.296 persoas.

URXENCIAS E INGRESOS

Fernández-Campa remarcou, ademais, que no ano 2016 se atenderon 999.075 urxencias hospitalarias -29.038 máis que en 2015-, cunha porcentaxe de ingreso de 16,46 por cento. Pola súa banda, nos Puntos de Atención Continuada (PAC), prestouse atención a 1.540.678 urxencias -40.335 máis que no ano anterior-. De todas elas, o 91,38 por cento foron resoltas no propio PAC.

Pola súa banda, os ingresos programados nos centros hospitalarios alcanzaron a cifra de 59.762 -2.421 máis que en 2015-, mentres que as chamadas ao O61 se situaron o pasado ano en 1.179.202.