VIGO | 20/01/2017 | Actualizada ás 18:32 por EUROPA PRESS
Os membros da candidatura 'Somos Quen', que concorre ao proceso interno de En Marea, mostráronse críticos "coas decisións que non toman os de abaixo", e censuraron que "cando se van conformando as organizacións, acaben tomando decisións os de arriba". "Facemos todo o posible para que iso non sexa así", mantiveron.
O acto de presentación en Vigo celebrouse na mañá deste venres no local da Marea de Vigo, onde estiveron presentes o cabeza de lista, Davide Rodríguez, e outros membros da candidatura como son a concelleira viguesa Marga López, así como Iria Morgade e Patxi Alonso.
Durante a presentación, recordaron que 'Somos Quen' confórmase coa "xente da base" e reiteraron o seu apoio a Villares como voceiro único do partido instrumental, porque tamén o apoiaron para optar á Presidencia da Xunta.
"Pensamos que neste momento En Marea precisa dun referente forte para darlle visibilidade", remarcou a concelleira da Marea de Vigo, Marga López, que engadiu que "cunha portavocía coral despistaría e minguaría o protagonismo que En Marea precisa".
Sobre a candidatura, Alonso indicou que, ao ver que decidiran "dende as alturas" facer unha lista, pensaron que "era moi interesante facer unha alternativa". "Somos Quen" vai a achegar ideas e renovación. Todo o mundo parece que ten intereses en estar nun sitio pero defender o que defende a cúpula, e iso non nos gusta", subliñou.
"Gustaríanos ter unha incidencia grande para colocar a En Marea no sitio, coa realidade de todos os días", destacou, defendendo que esa é unha fórmula que debería "primar en todos os partidos de esquerdas".
CANDIDATURA PLURAL
'Somos Quen', conta con Iria Morgade, de Pontevedra; Modesto Renda, de Vilalba; Sonia Vidal, de Xunqueira; Patxi Alonso, de Baixo Miño; Xurxo Triñanes do Barbanza; Jorge Lorenzo, de Laza; Marga López, de Vigo; Vanessa Garrido, do Courel; Aarón Franco e Sandra Pesqueira, de Marín; e Felix Domínguez, de Manzaneda.
En relación aos membros da lista, Marga López puxo en relevo que foi conformada en pequenas asembleas por todo o territorio e presenta "pluralidade e transversalidade", e incidiu en que as súas compoñentes saben que unidos terán "moita máis forza".
"Só unindo as nosas forzas poderemos derrotar o inimigo, e sabemos quen é o inimigo", asegurou, antes de remarcar que a presentación desta candidatura "non debera ser criticable nin criticada".
"Criticable sería en todo caso que só se decidisen as cousas entre tres ou catro e que os acordos tomados polo plenario non respectasen á militancia", finalizou.
Cuestionado acerca do proceso aberto, Rodríguez comentou que En Marea é unha organización política que aínda esta "despegando" e que con esta elección quedará "con suficiente músculo para atender as demandas dos veciños" e ser "referencia da esquerda galega". "Hai que chegar fortes para combater ao PP" nas municipais, rematou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.