SANTIAGO DE COMPOSTELA | 21/01/2017 | Actualizada ás 19:40 por EUROPA PRESS
O novo secretario xeral de Compromiso por Galicia, Juan Carlos Piñeiro, reivindicou que o seu partido "ten que ser o facho de ilusión" dos galegos e galegas.
Así se pronunciou Piñeiro tras ser elixido secretario xeral do partido, cargo ocupado ata o momento por Xoán Bascuas. "Compromiso vai facer política con sentidiño, fiscalizando o labor das administracións e propoñendo solucións para os numerosos problemas de Galicia", subliñou.
Tal e como indicou CxG nun comunicado, estas foron as primeiras palabras de Juan Carlos Piñeiro como secretario xeral da formación no II Congreso Nacional celebrado este sábado en Teo baixo o lema 'Renovando o galeguismo. Nova organización. Novas accións'.
Os militantes tamén elixiron os seus representantes no Consello Político Nacional, que estará formado por 30 persoas --15 homes e 15 mulleres--. Ademais, tamén se debateron varias emendas.
O secretario xeral saínte, Xoán Bascuas, quen foi arroupado polos aplausos dos asistentes, deu lectura ao informe de xestión, que foi aprobado por unanimidade.
O Congreso Nacional contou coa presenza do senador e membro da executiva do PNV, José María Cazalis.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.