O catedrático Adolfo Sotelo Vázquez afondará na figura de Camilo José Cela o 24 de xaneiro no Gaiás

O catedrático de Historia da Literatura Española Adolfo Sotelo Vázquez afondará na poliédrica figura e o legado literario de Camilo José Cela o 24 de xaneiro no Gaiás, en Santiago, no marco dunha xornada organizada pola Consellería de Cultura, Educación e Ordenación Universitaria.

A xornada -que é gratuíta, pero require inscrición previa- arrancará ás 16,30 horas no Museo Centro Gaiás e abordará múltiples caras do escritor como novelista, articulista, dramaturgo e académico, entre outras.

Sotelo Vázquez, tamén decano da Facultade de Filoloxía e Letras da Universidade de Barcelona, é o comisario da exposición 'CJC 1916-2016. O centenario dun Nobel', coa que se conmemora a Cela na Cidade da Cultura, onde se expón ata o 19 de febreiro.

Pola súa parte, a directora artística e decoradora Marta Villar Sanjurjo fará unha explicación da montaxe da exposición. A cita tamén contará coa presenza da Fundación Camilo José Cela, fundada polo propio escritor e encargada dende o seu falecemento en 2002 de xestionar o seu legado.