SANTIAGO DE COMPOSTELA | 24/01/2017 | Actualizada ás 20:10 por EUROPA PRESS
O programa 'Promociona', desenvolvido pola Fundación Secretariado Xitano de Galicia, busca promover a finalización dos estudios obrigatorios e frear o absentismo e o abandono escolar entre a comunidade xitana.
A iniciativa, que conta co apoio económico da Xunta, está destinada a alumnado do último ciclo de Educación primaria -5º e 6º curso- e de Secundaria -de 1º a 4º de ESO-, que reciben clases de apoio, orientación educativa e acompañamento individualizado.
A deste ano é a oitava edición deste programa, que comezou a implantarse en Galicia no curso 2008/09 na cidade de Pontevedra. Dende alí, expandiuse tamén aos concellos da Coruña, Vigo e Santiago de Compostela.
Este martes, o conselleiro de Política Social, José Manuel Rey Varela, visitou os participantes na iniciativa, onde destacou que a formación é "un piar básico para o desenvolvemento das persoas" e para "avanzar" na "igualdade de oportunidades real e efectiva".
Así, resaltou que é "prioritario" desenvolver "políticas activas" que avancen na "plena integración da comunidade xitana", que, a pesar dos "avances", "segue a padecer desvantaxes sociais".
"É necesario seguir adiante con medidas que nos axuden a derrubar aquelas barreiras sociais que se resisten a caer e conseguir unha sociedade máis xusta e inclusiva", manifestou Rey Varela.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.