As feridas na Confederación de Empresarios seguen abertas

O expresidente da confederación de empresarios de Galicia (CEG), Antonio Dieter Moure, advirte ao novo mandatario da patronal galega, Antón Arias, único candidato nas eleccións do pasado venres, de que "segue sendo reo dos caprichos das --organizacións-- provinciais".

En declaracións a Europa Press, Moure afirma que el tamén, como os representantes de Pontevedra e Ourense, Jorge Cebreiros e José Manuel Pérez Canal, respectivamente, considera que houbo "traizón" de A Coruña (con Antonio Fontenla á fronte) do pacto alcanzado para tratar de consensuar un único aspirante nos comicios.

E é que a última hora, a confederación coruñesa rexistrou a candidatura de Arias, vicepresidente ata agora nesa provincia. Este, no seu discurso tras a súa proclamación o venres, cun 60% de apoios da asemblea, negou tal traizón e fixo un chamamento á unidade e a esquecer "cuitas do pasado".

Agora, o seu antecesor no cargo, que estivo na presidencia da CEG durante nove meses (de mediados de xaneiro a principios de outubro do ano pasado), augúralle un panorama complicado, aínda que espera que a institución "teña futuro".

Carga ademais contra o voceiro dos empresarios de Lugo, Jaime López, ao que cre "un lastre" para o novo dirixente e acúsalle de "impresentable".

Antonio Dieter Moure desexa sorte ao seu sucesor e resalta que o chamou o venres para felicitalo. Sobre a reforma de estatutos que propoñen Arias, recorda que el xa o intentou, pero que a tarefa é difícil, se ben "imprescindible", pois o documento vixente é propio "do paleolítico". Debería ser, ao seu xuízo, unha modificación "consensuada" coas sectoriais, que deben ser contempladas no funcionamento interno da patronal.

Opina que Antón Arias o ten "máis doado" que el, pois "poderá dominar" o comité executivo a contar co respaldo de A Coruña e Lugo, polo que poderá designar a un tesoureiro e a un contador, nomeamentos que ao empresario ourensano lle custou sacar adiante.

De feito, Moure deixou a patronal galega ao perder a confianza de Fontenla e ante a división interna, pero destaca que el accedeu á presidencia aupado por "case todas as organizacións sectoriais, A Coruña, "a metade de Pontevedra e 12 votos de Ourense". "Non levaba Lugo", recoñece, a liña seguida.

A diferenza, segundo sinala, é que nestes momentos o novo presidente se atopa coa oposición de Ourense e Pontevedra "en bloque", e a de Arias "non era unha candidatura de sectoriais".

Neste escenario, pregúntase "qué intereses hai" e houbo para que A Coruña e Lugo non tratasen de chegar a un acordo aínda que fose coa mesma figura de Arias, que xera boa acollida por parte da maior parte dos empresarios. "Algúns queren estar e que se lles vexa", resolve.

A CEG, EN HORAS BAIXAS

Antes de Antón Arias e que Antonio Dieter Moure, o vigués José Manuel Fernández Alvariño estivo ao mando da CEG durante dous anos convulsos (de 2013 a 2015), pola oposición interna á súa polémica xestión.

Previamente, de 2001 a 2009 e de 2009 a 2013, foi Fontenla o encargado de liderar á patronal galega, en horas baixas a día de hoxe polas dificultades económicas e rozamentos coa Xunta, coa que litiga por unha partida relativa a un proxecto de oficinas no exterior.