Realmente é Rusia quen está ciberatacando a Estados Unidos?
Unha experta en ciberseguridade de Telefónica mostrará mañá na Coruña os indicios de que algunhas das actividades atribuídas aos rusos poderían ser ataques de falsa bandeira. Yaiza Rubio é unha das relatores do “María Pita Defcon”.
Por Galicia Confidencial | A Coruña | 08/03/2017 | Actualizada ás 17:30
A analista de intelixencia de ElevenPaths, unidade de ciberseguridadee de Telefónica, Yaiza Rubio, participará mañá xoves no I Congreso María Pita DefCon, que reunirá ata o vindeiro venres na facultade de Informática da Universidade da Coruña aos maiores expertos nacionais sobre seguridade informática. O evento, no que se prevé a asistencia de máis de 500 participantes, abordará tamén a visibilización e integración da muller no ámbito das TIC.
Rubio compartirá, ás 13:00 h., mesa redonda coa investigadora e docente da Universidade de Alcalá de Madrid (UAH), Miriam Martínez, a responsable de Seguridade (CISCO) de R, Susana Rey, e a programadora e perito informático de Forensic & Security, Pilar Vila, para debater sobre o papel da muller no mundo da ciberseguridade.
Pola tarde, ás 16:30 h., a experta en ciberseguridade de Telefónica ofrecerá unha conferencia sobre os Ataques de falsa bandeira, centrada na investigación que levou a cabo sobre o ataque organizado por un grupo de piratas informáticos contra a Axencia Mundial Antidopaxe (AMA) en 2016, e que supuxo a revelación de datos confidenciais de deportistas estadounidenses.
Durante a súa exposición, Rubio demostrará que, a pesar de que a autoría do roubo de información atribuíuse desde un primeiro momento ao grupo de hackers ruso Fancy Bears, atopáronse evidencias que desvelan que a información podería ser exposta de maneira intencionada para simular que o ataque procedía de Rusia, sendo este país obxecto dun ataque de falsa bandeira.
Con este termo derivado do concepto militar izar cores falsas, é dicir, a bandeira dun país diferente ao propio, denomínase ás operacións encubertas desenvolvidas por gobernos ou organizacións para culpar a países inimigos de determinadas accións por intereses políticos.
