Os grandes lumes volven a Ourense
Durante esta semana varios grandes incendios afectaron a tres concellos ourensáns, un deles ao parque natural do Xurés.
Por Galicia Confidencial | SANTIAGO DE COMPOSTELA | 17/03/2017 | Actualizada ás 11:32
A primavera anticipada que está vivindo Galicia tamén está traendo os primeiros grandes lumes do ano, especialmente, á provincia de Ourense. Se a pasada semana era un incendio de máis de 100 hectáreas o que afectaba a Carballeda de Valdeorras, esta semana outros grandes lumes tamén afectaron a Piñor, Entrimo e O Irixo.
O último, o de Piñor (Ourense), quedou extinguido na madrugada deste venres tras queimar unhas 25 hectáreas. Tamén o xoves tivo lugar outro no Irixo que, segundo as estimacións provisionais, calcinou unhas 20 hectáreas de terreo.
O incendio máis grave da semana afectou, o pasado martes, ao parque natural Baixa Limia-Serra do Xurés no municipio ourensán de Entrimo tras arrasar unhas 35 hectáreas. Segundo informou a Consellería do Medio Rural, o incendio orixinouse en Portugal e afectou á parroquia de Pereira.
