SANTIAGO DE COMPOSTELA | 23/03/2017 | Actualizada ás 19:36 por EUROPA PRESS
O Parlamento de Galicia reclama que se simplifiquen os requisitos relativos á esixencia de levar botiquines a bordo para a frota de baixura, debido ás súas particularidades.
En concreto, a comisión de pesca da Cámara galega aprobou este xoves unha proposición non de lei, autoría do PP, coa que os parlamentarios (houbo 11 votos a favor e unha abstención) solicitan á Xunta que se dirixa á Unión Europea para "explicar a realidade" da baixura.
O obxectivo é que se simplifiquen as esixencias, "adecuándoas ás circunstancias de proximidade, inmediata asistencia médica e limitación de espazo a bordo" deste tipo de embarcacións.
En decembro pasado, tras unha reunión en Bruxelas coa Dirección Xeral de Emprego, a conselleira do Mar, Rosa Quintana, sinalou que se deu "un paso adiante" para as 3.800 embarcacións galegas que faenan preto da costa.
Son buques, estes, que ven obrigados pola normativa europea a levar un "engorroso" botiquín, en palabras da propia conselleira entón, "que lles supón máis dunha dor de cabeza" cada vez que teñen que pasar a revisión.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.