Consello.- A Xunta recomenda instalar desfibriladores en estacións, centros educativos e outros lugares públicos

O Goberno galego autorizou o decreto polo que se regula a instalación e o uso de desfibriladores externos fose do ámbito sanitario, que establece as normas para a implantación de desfibriladores automáticos e semiautomáticos (DESA) na Comunidade.

O seu obxectivo, segundo remarcou o presidente galego, Alberto Núñez Feijóo, é que en Galicia se logre "a mellor cobertura deste equipamento" e "o maior número de persoas formadas para o seu uso", sexan ou non profesionais sanitarios.

O texto incide na concienciación da sociedade sobre a necesidade de dispor deste tipo de aparellos en lugares onde se concentre un elevado número de persoas.

Neste sentido, recomenda a súa instalación en espazos como grandes establecementos e centros comerciais, aeroportos, portos comerciais, estacións e apeadeiros de autobús ou ferrocarril, establecementos públicos, instalacións deportivas e centros educativos, entre outros.

Feijóo subliñou que se trata de "recomendacións" e non dunha obrigación, aínda que nos centros educativos e outras instalacións que dependan da Administración autonómica deu por feito que se atenderá ás mesmas.

IMPULSAR A FORMACIÓN

Tamén sinala que as administracións sanitarias de Galicia impulsarán a formación en contidos de soporte vital básico e manexo de desfibriladores e promoverán os mecanismos de coordinación oportunos con protección civil, bombeiros e policía local para estender a instalación e uso destes aparellos.

Este compromiso da Administración pública vese reforzado ao establecer, así mesmo, que nas licitacións de contratos a oferta de desfibriladores supoña unha mellora que contabilice no concurso.