Augas de Galicia confirma a alta contaminación por metais tóxicos dos efluentes da mina de San Fins
ADEGA insta a este organismo público a que lle denegue o permiso de vertedura a Tungsten San Finx SL, actual concesionaria da mina.
Por Galicia Confidencial | Compostela | 24/03/2017 | Actualizada ás 16:00
Augas de Galicia acaba de confirmarlle á organización ecoloxista ADEGA que os afluentes da mina de San Fins sofren alta contaminación por metais pesados.
O pasado xaneiro, esta entidade puxera en coñecemento dese organismo público novas verteduras ao dominio público dende esta mina tras tinguir de laranxa o rego de San Fins. E, agora, o expediente aberto por Augas de Galicia confirma outra volta e con novas analiticas, que algúns metais tóxicos sobardan os límites legais mesmo 1500m augas abaixo da mina.
"Estes metais pesados son bioacumulativos e tenden a concentrarse nos tecidos vivos ao longo de toda a cadea trófica, polo que antes ou despois acabarán provocando alteracións fisiolóxicas e xenéticas. E lembremos que rego de San Fins desauga no Vilacoba e este na ría de Noia, centro dunha grande produción marisqueira", indica a organización ecoloxista.
Denuncias
Prcisamente, ADEGA xa denunciara que o proxecto de "Tungsten San Finx SL" de recuperar a actividade mineira traía de agasallo a vertedura de 1 millón de metros cúbicos anuais procedentes das galerías inundadas, e que estas augas tiñan unha alta carga contaminante de metais tóxicos. Así o confirmaron as anlíticas realizadas pola entidade ecoloxista en 2016.
"A resposta da empresa foi, por unha banda, solicitar a suspensión do procedemento por 3 meses para proceder a novos estudos de tratabillidade e calculos hídricos e estruturais", lembra ADEGA, que indica que tamén ameazou con denunciar a un membro desta entidade por ter accedido sen permiso ao "seu" recinto mineiro.
Por iso, ADEGA insta a Augas de Galicia a que conclúa xa o expediente denegando o permiso de vertedura a "Tungsten San Finx SL" . "O contrario significaría un inxustificábel favoritismo cunha empresa cuxa actividade supón un risco certo para a saúde ambiental e cidadá", conclúe.
