Rosa Cedrón, pregoeira de luxo para Sober
Tras un mes de intensa actividade cultural a monfortina será a protagonista da XXXVII Feira do Viño de Amandi.
Por GC Tendencias | Sober | 04/04/2017 | Actualizada ás 17:37
O Concello de Sober vive con especial interese a chegada da Feira do Viño de Amandi e tan é así que dedica un mes enteiro a organizar actividades de gran interese cultural e divulgativo. Este ano por exemplo, no Centro Sociocultural da vila houbo un concerto de piano a cargo da malagueña Esperanza Martín López, unha Xornada de Maridaxe de Viño de Amandi con castañas de Galicia, a presentación da Asociación de Apicultores da Ribeira Sacra ou unha xornada divulgativa baixo o título de “A imaxe dos viños” a cargo de Humberto Loureiro na que se destacou a importancia do deseño, normativa e tendencias na etiquetaxe dos viños.
Pero dúas das actividades están a chamar especialmente a atención, unha “cata comentada de viños para mulleres embarazadas” celebrada o 25 de marzo e o “concurso de talla con motoserra” que se está a realizar na Praza do Concello entre o 1 e o 7 de abril. As pezas que se elaboren polos concursantes formarán parte do mobiliario da Feira do Viño e posteriormente decorarán os edificios públicos de Sober.
A pregoeira será Rosa Cedrón, recoñecida cantante e intérprete de Monforte de Lemos, que ofrecerá un concerto o sábado día 8 ás 22.30 h. e que se dirixirá ao público o domingo 9 ás 13.00 h. no escenario habilitado ao efecto diante do Concello
