Ecoloxistas encherán o Obradoiro de eucaliptos para denunciar a súa proliferación
Máis de 30 colectivos realizarán unha acción de protesta esta fin de semana co obxectivo de denunciar o impacto que esta especie invasora está tendo nos montes do país.
- Avanza a creación dunha gran plataforma contra o eucalipto en Galicia
- Os eucaliptos reducen a biodiversidade e secan os regatos galegos
Por Galicia Confidencial | Santiago de Compostela | 17/04/2017 | Actualizada ás 14:12
O colectivo Cousa de Raíces e a Asemblea contra a Eucaliptización de Compostela, que reúnen a máis de 30 colectivos diferentes, realizarán este 22 de abril unha acción protesta coincidindo co Día da Terra. O seu obxectivo é encher simbólicamente a Praza do Obradoiro de Santiago con eucaliptos para denunciar o impacto que esta especie invasora ten en Galicia.
Nesta concentración realizarase unha performance que consistirá na simulación da plantación con eucaliptos da principal praza compostelá. "Esta plantación simbólica da Praza do Obradoiro tentará promover a reflexión sobre o desleixo que os nosos montes e agras están a sufrir fronte as plantacións masivas de eucaliptos, moitas delas ilegais, sen que a Administración faga nada por frealas", apuntan os impulsores nun comunicado.
Neste acto tamén se denunciará a destrución do patrimonio natural e cultural que está a provocar o monocultivo forestal desta especie invasora no noso territorio. Verdegaia, Erva e Adega son algúns dos grupos ecoloxistas que secundarán a protesta.
