A alcaldesa de Mos, “entusiasmada” con acoller a cidade deportiva do Celta
Nidia Arévalo (PP) nega negociacións co club pero aproveita para atacar a Abel Caballero e os socialistas.
Por gcdeportes | Vigo | 07/04/2017 | Actualizada ás 20:19
A alcaldesa de Mos, Nidia Arévalo (PP) admitiu este venres o seu "entusiasmo" ante a posibilidade de que o Real Club Celta se plantexe construír a súa cidade deportiva neste municipio limítrofe con Vigo, aínda que negou que houbese negociacións ou avances respecto diso.
En resposta aos medios, acerca das declaracións do presidente do club, Carlos Mouriño —quen asegurou que o Celta marcha da cidade olívica porque o "botan"—, a rexedora de Mos sinalou que este municipio "ten posibilidades e non pode ocultar o entusiasmo" que suporía albergar as instalacións da entidade celeste.
"Outros alcaldes pensarían o mesmo que eu. Pero a día de hoxe non hai nada máis", asegurou Nidia Arévalo, quen apuntou que a marcha do Celta é "un exemplo máis" dos problemas e enfrontamentos do alcalde de Vigo, Abel Caballero, co resto de institucións e administracións. "Xa non é só Feijóo, é o reitor, o resto de alcaldes, o presidente do Celta", engadiu.
