Premio Johán Carballeira de Xornalismo para Montse Dopico e María Obelleiro
Para o xurado, as reportaxes premiadas representan o novo xornalismo galego escrito por mulleres e destacan dous ámbitos fundamentais para este galardón: o do xornalismo cultural e o do social.
Por Galicia Confidencial | Bueu | 19/04/2017 | Actualizada ás 10:30
O XIV Premio Johán Carballeira de Xornalismo, promovido polo Concello de Bueu, recae este ano en dúas mulleres galegas, concretamente en Montse Dopico, coa súa reportaxe “Galaxia vs Galaxia. A construción de hexemonía cultural”, publicada na revista Luzes, e a de María Obelleiro Hermida, titulada “O apartheid sanitario na Galiza”, que saíu en Sermos. O xurado estivo conformado por Manuel A. Mosteiro, presidente da Asociación de Amigos de Johán Carballeira de Bueu, Montse Fajardo, xornalista e experta nas historias da memoria histórica, e Antón Lopo, gañador da pasada edición.
De entre os dezanove traballos presentados, dos que se destaca a esencia do xornalismo de Johán Carballeira, o xurado decidiu premiar estes dous, ao ser “modelos de esixencia técnica e de investigación, que son ademais complementarias en dous ámbitos fundamentais para este galardón: o xornalismo cultural e o xornalismo social”. Ademais, o xurado insiste na calidade xeral dos traballos presentados, na súa variedade temática, de estilo e de enfoque que recollen a identidade do premio.
Ambas as dúas xornalistas, serán premiadas cun premio de 750 euros cada unha e serán homenaxeadas nun acto que se organizará na Semana das Letras Galegas.
No que atinxe á modalidade de poesía deste premio, o xurado vaise reunir o próximo 6 de maio ás 10.30 horas e terá que escoller un gañador ou gañadora de entre os corenta e seis poemarios presentados.
