Máis dun milleiro de atletas na IX Carreira Popular de Monforte
A carreira celébrase este domingo e a cifra concreta de participantes ascende a 1.081 atletas.
Por Galicia Confidencial | Monforte | 22/04/2017 | Actualizada ás 17:25
Monforte acolle este domingo a súa IX Carreira Popular, na que participarán 1.081 atletas. Un dos corredores confirmados é Nuno Costa, vencedor da última edición da media maratón Vigo-Baiona, un feito que garante unha cabeza de carreira de alto nivel.
O evento conta con cinco carreiras, catro de categorías de menores de 80, 700, 1.300 e 2.000 metros, e por outra parte, unha carreira absoluta de 7.000 metros. O inicio das probas de menores será ás 11 da mañá, mentres que a carreira absoluta sairá ás 12 horas.
“Todas as carreiras teñen un percorrido totalmente urbano e moi atractivo, xa que parten da explanada da Compañía e discorren por varias rúas do casco histórico da cidade”, sinala o alcalde.
Entre as probas de menores e a proba absoluta establécense un total de 14 categorías, o que da lugar a un reparto importante de trofeos, xa que os tres primeiros clasificados de cada categoría recibirán un trofeo conmemorativo do evento.
A única categoría na que non haberá clasificación é na MINI, onde todos os participantes levarán unha medalla e unha bolsa de lambetadas como agasallo.
Ademais dos premios por categorías, haberá tamén premios especiais para os mellores atletas locais e para os gañadores absolutos da proba.
Todos os participantes que rematen cada unha das carreiras nas que participen recibirán unha camiseta conmemorativa do evento así como avituallamento sólido e líquido.
