Aprazado o xuízo contra o exalcalde de Negreira (A Coruña) por unha posible incompatibilidade do xuíz

O titular do Xulgado do Penal número 1 da Coruña decidiu aprazar o xuízo que estaba fixado para este luns contra o exalcalde de Negreira (A Coruña), o socialista Jorge Tuñas, por suposta apropiación de 18 teléfonos móbiles e tamén para a que fose tenente de alcalde, Pilar Pérez, polo mesmo motivo.

Segundo confirmou aos medios de comunicación o letrado do exrexedor, o xuíz tomou esta decisión ao comprobarse que existía un informe relacionado coa causa asinado pola súa muller, que é fiscal.

Ante a posibilidade de que exista algún tipo de incompatibilidade para que xulgue o caso, e á espera de que se pronuncie a este respecto a Audiencia Provincial da Coruña, o xuízo suspendeuse.

En concreto, a Fiscalía considera a Jorge Tuñas, que presentou o seu cesamento o pasado 20 de abril, autor dun delito de apropiación indebida por non devolver un total de 18 teléfonos ao Concello unha vez cesado do seu cargo como alcalde fai dúas lexislaturas.

INHABILITACIÓN

No seu escrito de acusación, o Ministerio público pide un ano e nove meses de cárcere, con inhabilitación especial para presentarse como candidato nos procesos electorais durante o tempo da condena. Ademais, pídeselle unha multa de 6.798,15 euros, equivalente ao valor total dos 18 terminais móbiles.

Tamén está imputada por apropiación indebida á tenente de alcalde naquela lexislatura, Pilar Pérez, para a que a Fiscalía pide un ano de cárcere e tamén inhabilitación para ser elixida como cargo público durante o tempo que dure a condena.

A ela atribúeselle quedarse con seis teléfonos e un kit mans libres para o coche, por valor de 1.893,09 euros, importe polo que se lle impón unha multa.