Por Galicia Confidencial | Dodro | 05/05/2017 | Actualizada ás 09:00
O Concello de Dodro, por unanimidade de toda a corporación, aprobou este xoves unha moción do grupo municipal da Unidade Veciñal de Dodro para solicitar á Real Academia Galega que dedique o Día das Letras Galegas a Eusebio Lorenzo Baleirón.
A sesión celebrouse co salón de plenos ateigado con representantes das asociacións de veciños, comunidades de montes, asociación culturais e deportivas e anpas que quixeron, deste xeito, apoiar a figura do escritor.
“Para nós como dodrenses, parécenos de xustiza que se lle outorgue este recoñecemento, e para facelo visible foi a maneira polo que solicitamos a celebración do pleno extraordinario para reafirmar a demanda de todo o pobo de Dodro”, suliñou Unidade Veciña de Dodro nun comnicado.
Eusebio Lorenzo Baleirón
Eusebio Lorenzo Baleirón, naceu en Laíño (Dodro) o 25 de xaneiro de 1962 e finou o 14 de decembro de 1986 tamén en Dodro. Era irmán do tamén escritor Manuel Lorenzo Baleirón. A pesar da súa pronta morte tivo unha prolixa actividade literaria. En 1985 sacaría á luz dous poemarios: Os días olvidados e O corpo e as sombras, a esa altura publica tamén un libro de narrativa xuvenil: O libro das viaxes e dos soños. A morte prematura impediulle ver editado o que sería o seu terceiro poemario, A morte presentida, que foi publicado postumamente en 1988.
No décimo aniversario da morte do poeta editouse a súa obra poética completa: Gramática do silencio. Obra poética. Así mesmo, en 2000 saíu á luz Antología Poética, unha antoloxía bilingüe (galego-español) baixo o coidado de Ánxeles Penas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.