Por Galicia Confidencial | A Coruña | 11/05/2017 | Actualizada ás 11:53
O PPdeG plaxiou parte dunha noticia do xornal dixital El Español para realizar unha iniciativa parlamentaria. Este grupo rexistrou, o pasado 7 de abril, unha proposta para instar á Xunta a "planificar actuacións que favorezan o impulso do HUB de gas natural licuado (GNL)" na planta de Reganosa e, parte da argumentación desa iniciativa, estaba literalmente copiada dun artigo do xornal dixital.
Este medio publicou o 30 de xuño de 2016 unha noticia co título "Gas natural licuado: o futuro do transporte marítimo sustentable" e o PPdeG utilizou “a mesma redacción, as mesmas palabras... e catro parágrafos da nosa publicación”.
Foi a deputada de BNG Noa Presas a que descubriu a coincidencia entre a redacción da iniciativa popular e o artigo del Español. Segundo relata o xornal, a deputada nacionalista decidiu buscar información sobre o tema para abordar o Pleno e chegou ata esta publicación. Por iso sorprendeuse cando xa na sede parlamentaria galega escoitou, por parte do portavoz popular, Miguel Tellado, unhas palabras “que lle soaban".
“Esta actitude é eticamente cuestionable e "escandalosa porque o PP ten unha política moi agresiva en Galicia contra a oposición, á que acusa continuamente de falta de rigor e de non documentarse en moitas das iniciativas que presentan”, denuncia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.