SANTIAGO DE COMPOSTELA | 23/05/2017 | Actualizada ás 14:20 por EUROPA PRESS
Os integrantes do histórico grupo popular A Roda presentaron este martes en Santiago un disco co que queren conmemorar catro décadas de actividade nas que "'A Roda' non deixou de xirar" e tras o que confían en continuar "40 anos máis".
O conselleiro de Cultura, Román Rodríguez, e o secretario xeral de Política Lingüística, Valentín García, participaron na presentación deste traballo, co que se celebra o 40 aniversario de "unha institución cultural" que leva catro décadas "traballando en favor da cultura galega".
Román Rodríguez destacou que a misión fundamental de A Roda foi a de "tentar xuntar a alta cultura co canto máis popular", coñecido como o "canto de taberna", así como converter "poemas cultos" en "pezas populares".
Tras destacar o seu importante labor na recuperación da tradición oral galega, o conselleiro eloxiou a todos os que integraron este grupo desde a súa creación, especialmente á figura de Fito Domínguez, que foi voz e imaxe do grupo durante 35 anos.
Nacido en Vigo en 1977, A Roda é un dos grupos máis antigos e coñecidos de Galicia. O disco conmemorativo '40 anos máis' ten como obxectivo homenaxear unha traxectoria de 17 discos no mercado, multitude de premios e actuacións ás dúas beiras do Atlántico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.